Толқын Арал аудандық қоғамдық-саяси газет
» » Аудан әкімі ғасыр жасаған әжейді құттықтады

Аудан әкімі ғасыр жасаған әжейді құттықтады

Халықаралық қарттар күні мерекесіне орай аудан әкімі Серік Сермағамбетов Арал қаласында тұратын 100 жастағы Жүрсінбаева Күлмаш әжейдің отбасына барды.

Мерекемен құттықтай келген аудан басшысы ғасыр жасаған кейуананың жағдайын сұрап, бала-шаға мен немере-шөберенің ортасында ақылшысы болып, аман отыруын тілектестігін білдіріп, сый-сияпат табыстады.

Өнегелі әулеттің отын маздатқан шамшырағы болған Күлмаш әжей бейнетпен өткен ғұмырының зейнетіне бөленіп, ұрпақтарының алдында бақытты өмір кешіп келеді.

Ертеректе тылда тер төгіп, туған жерінде еңбек еткен аяулы ана, ардақты әже өмірге әкелген 5 перзентінен 12 немере 22 шөбере сүйіп отыр.

Арнайы құттықтай келген аудан басшысына ризашылығын білдірген кейуана елдің амандығын тілеп, ақ батасын берді.
Аудан әкімдігінің баспасөз қызметі

01 қазан 2021 ж. 87 0