ҒАСЫР ЖАСАҒАН АНА ҚҰРМЕТКЕ БӨЛЕНДІ
Аудан әкімі Мұхтар Әуесұлы және аудандық мәслихат хатшысы Дәуренбек Жолдасұлы Сазды ауылдық округінің тұрғыны, аудандағы ең қарт ана Танымбетова Жонай әжейдің үйіне арнайы барып, хал-жағдайын сұрап, мерекемен құттықтады.Аудан басшысы 109 жастағы кейуананың иығына ақ жаулық жауып, сый-сияпат пен құттықтауын табыстады.Ғасыр жасаған Жонай әже бейнетпен өткен ғұмырының зейнетіне бөленіп, ұрпақтарының алдында бақытты өмір кешіп келеді.
Туған жерінде еңбек етіп, ауылдың өркендеуіне өз үлесін қосқан аяулы ана, ардақты әже өмірге әкелген 8 перзентінен 31 немере 60 шөбере мен 9 шөпшек сүйіп отыр.
Жонай әжей мереке қарсаңында арнайы құттықтай келген азаматтарға ризашылығын білдіріп, елдің тыныштығы мен амандығын тілеп, ақ батасын берді.
