"Алтын белгі" иегерлері жеңіске жетті

Облыста 17 маусым мен 5 шілде аралығында өткізілген Ұлттық бірыңғай тестілеу өз мәресіне жетті. Биылғы Ұлттық бірыңғай тестілеу аудан мектеп түлектері үшін Қазалы ауданында жүргізілді.

Айрықша атап өтерлігі, Арал ауданының екі түлегі Аршын Әбдіхалық пен Сымбат Жақсылықова 131 ұпай жинап, жоғары нәтиже көрсетіп, аудан мерейін үстем етті.

Биылғы оқу жылында қаладағы №260 орта мектебінің «Алтын белгі» иегері, аудандық, облыстық олимпиадалар мен байқаулардың жүлдегері Аршын Арманұлы Әбдіхалық Ұлттық бірыңғай тестілеуден биіктен көрініп, білімді шәкірт екенін дәлелдеді.

Әр білім алушының талабына қанат байлаған мұғалім еңбегі өлшеусіз және білім бәйгесінде бағы жанып, бабы келісуіне ата-анасының қолдауы зор болды. Ата-ана мен ұстаздың үмітін ақтап, қуанышы бола білген Аршын әкесі Арман мен анасы Зауренің екінші перзенті болса, осы шаңырақтағы екінші «Алтын белгі» иегері. Осыдан екі жыл бұрын ағасы Елхан да мектеп абыройын асырып, «Алтын белгіні» кеудесіне таққан еді.

Осындай алғыр шәкірт, ҰБТ-дан жоғары балл жинаған №83 орта мектептің түлегі, "Алтын белгі" иегері Сымбат Бақытбекқызы Жақсылықова:

– Мен осы өзімнің алтын ұям №83 орта мектепте бірінші сыныптан бастап оқимын. Ең жоғары балл алуым ең алдымен осындағы ұстаздарымның еңбегі деп білемін. Кез келген ұстаз шәкірт тәрбиелеуде айтарлықтай жетістікке жетіп жатса, онда бұл олардың адал да жанкешті еңбегінің жемісі деп білемін. Жалпы, маған өз мектебімдегі мұғалімдерімнің сабақ берудегі әдістемелері мен ұстанымдары ұнайды. Санаға ақыл ұялататын, әр кезде аялайтын, сабағы мен ақылын аямайтын, өнегесі асыл ұстаздарым мен осындай жетістікке жетуіме бағыт-бағдар беріп, қолдау білдірген ата-анама мың алғыс! – деген жас түлек жүрекжарды тілегін жеткізді.

Біз де табыс төрінен көрінген, арманы асқақ жас түлектер – Аршын Арманұлы мен Сымбат Бақытбекқызының болашақта таңдаған мамандық иесі атанып, өмірде көздеген мақсат-мұратына жетуіне тілектеспіз.

"Толқын" ақпарат