Көктем ауылы таза ауыз суға қосылады

Биыл Арал ауданын таза ауыз сумен қамту бойынша қарқынды жұмыстар жүруде. Соның бірі Сапақ елді мекеніне қарасты Көктем елді мекеніндегі ауыз су жүйесінің құрылысы. 25 шақырымды құрайтын «Сапақ-Көктем» магистарльды су құбырын тартуға облыстық бюджеттен 339 млн.тг. бөлінген. Қазіргі таңда елді мекендегі су айдау стансасының ішкі құрылғыларын орнату жұмыстары жүргізілген. Сондай-ақ ауылішілік 3,8 км су желісі жүргізіліп, 40 тұрғын үй, 2 әлеуметтік нысанға су құбыры тартылған.

Аудан әкімі Серік Сермағамбетов ауыл халқымен кездесіп, осы айдың соңына дейін таза ауыз судың қосылатындығын жеткізді. Аудан басшысы мердігер мекемеге сыртқы қоршау және су айдау құрылығыларын тез арада орнатуды, абаттандыру мен тағы басқа жұмыстарды сапалы жүргізуді тапсырды.

Мұнан соң аудан әкімі №227 негізгі мектебінде болып білім ұясының жылыту маусымына дайындық барысын бағамдады. Сондай-ақ ауыл әкімі мен жауапты бөлімге қысқы маусымға байланысты көмір және отын қорын ертерек, жеткілікті көлемде әзірлеу үшін тиісті шаралар қабылдауды тапсырды.