Маңызды мәлімдеме
Қазақстан президенті Нұрсұлтан Назарбаев үкіметті отставкаға жіберді. Бұл туралы осыдан бірер күн бұрын Елбасының мәлімдемесі Ақорда сайтында жарияланды. Енді ел үкіметіне жаңа басшы келмек. Елбасы өз мәлімдемесінде: – «Мен бүгін еліміз үшін маңызды шешім қабылдағалы отырмын. Өткен жылдардағы әлеуметтік-экономикалық ахуал тұрақты болды. Бұл – әрине, жақсы кезең. Бірақ, бұл қазіргі уақыт талабы үшін жеткіліксіз. Мен тұрғындардың табысы мен тұрмыс сапасы әрбір үкімет мүшесі мен әрбір әкімнің жұмысындағы негізгі басымдық болу керек деп бірнеше рет айттым. Екі жыл бұрын біз конституциялық реформа жүргіздік. Осыған орай үкімет әкімдермен бірге әлеуметтік-экономикалық мәселелерді шешіп, оған жауап беру үшін барлық тиісті өкілеттік пен дербестікке ие болды. Мемлекеттік бағдарламаларды жүзеге асыру барысына жасалған талдау қорытындысы олардың орындалып жатқанын көрсеткенімен, көптеген маңызды бағыттар бойынша нақты нәтижелердің жоқ екенін аңғартты. Бұл ретте, мен ел президенті әрі Конституцияның кепілі ретінде халықтың мүддесін ескере отырып, мынадай шешім қабылдадым. Үкімет отставкаға кетуге тиіс деп санаймын. Үкіметтің жаңа басшылығы өмір сүру деңгейін арттыру, экономиканы ынталандыру, стратегиялық міндеттерді жүзеге асыру жөнінде нақты шаралар әзірлеуге тиіс. «Нұр Отан» партиясының жақында өтетін съезінде әлеуметтік қолдауды күшейтуге және азаматтардың тұрмыс сапасын арттыруға арналған бірқатар шаралар ұсынып, бұған бюджеттен және Ұлттық қордан қомақты қаржы бөлінетін болады. Үкімет пен барлық деңгейдегі әкімдердің жұмысы осы міндеттерді жүзеге асыруға бағытталуы тиіс. Үкімет пен өңірлердің иелігіндегі қаражат көзделген мақсатқа сай жұмсалмай отыр. Мұның бәріне бақылау орнатылады. Осы бағыттар жөнінде «Нұр Отан» партиясының съезінде толығырақ айтылатын болады,-деп ойын түйіндеді Назарбаев.Иә, көптің ойын дөп басқан маңызды мәлімдеме осылайша ел тұрғындарының ертеңге деген сенімін оятты. Бастысы елдің тұрмыс сапасын арттырып, табысын еселеуге мүмкіндік беретін басты шаралар қабылданатынына сенім мол.
«Толқын» ақпарат.
