Мектеп асханаларының жай-күйі зерделенді

Жаңа оқу жылынан бері яғни 2023 жылдың қыркүйек айынан бастап мектеп қабырғаларындағы барша бастауыш сынып оқушылары ыстық тамақпен қамтылды. Бүгінде аудандағы 9853 бала тұрақты түрде бір мезгілдік тегін тамақ ішеді.Облыс әкімі Н.Нәлібаев аймағымыздағы білім ордаларының асханаларындағы балаларды тамақтандырудың стандартын, жалпы оларға берілетін тамақтың сапасы сынды мәселелерді қадағалау жөнінде тапсырма берген болатын.
Осыған орай, бүгін аудан орталығындағы білім беру ұйымдарындағы асханаларға аудан әкімінің орынбасары К.Бержанов бастаған топ бақылау жұмыстарын жүргізді. Олардың қатарында білім бөлімі қызметкерлері, депутаттар, арнайы сала мамандары, қоғам белсенділері мен жастар болды.
Зерделеу барысында балаларға әзірленген тамақтың сапасы, асхананың санитарлық тазалығы, тағамдардың күнделікті ас мәзіріне сай берілуі, азық-түлік сертификатының болуы, сондай-ақ, қоймадағы шикі тағам өнімдерінің жарамдылық мерзімі тексерілді.
Балалардың қауіпсіздігін басты мақсат еткен аталған шара алдағы уақытта да жалғасын табады.