Аудан әкімінің жұмыс сапары Жіңішкеқұм мен Қарақұм ауылдық округінде жалғасты

Аудан әкімі Аманжол Оңғарбаев ауданға қарасты Жіңішкеқұм, Қарақұм ауылдық округтерінде болып, жергілікті халықпен жүздесті.

Аудан басшысының сапары Жіңішкеқұм ауылдық округінде басталды. Округте қазіргі таңда қайта салынып жатқан №248 орта мектебі мен ауылдық округ әкімі ғимараты және елдімекендегі халыққа үздіксіз қызмет көрсетіп отырған дәрігерлік амбулаторияның бүгінгі жайымен танысты.

Іссапар барысында аудан әкімінің ауыл тұрғындарымен кездесуі ауылдық клуб ғимаратында өтті. Мұнда аудан әкімі биылға жоспарланған жобалар мен міндеттерге тоқталып, өңірдегі жаңа бастамаларды баяндады.

«Аймақта, өңірде жасалынып жатқан жұмыстарды өздеріңіз жақсы білесіздер. Соңғы екі жылдың көлемінде облыстың бюджеті екі есеге өсті. Дәл осындай даму динамикасы ауданда да қалыптасып отыр. Өткен жылы 24 млрд. теңгеден аса инвестиция тартылды. Үстіміздегі жылдың даму бюджеті 12 млрд. теңгеге жуықтап отыр. Аудан орталығында үлкен жоба жүзеге асып жатыр. Қаланы екі бетін жалғайтын темір жол үстінен өтетін көпір құрылысы бүгінде қарқынды жүруде. Өткен жылы Тастүбек пен Жалғызағым елді-мекендерінде медициналық бекет пайдалануға берілді. «Ауылдық денсаулық сақтауды жаңғырту» ұлттық жобасы аясында Қызылжар мен Бөген ауылдарында заманауи үлгідегі амбулатория бой көтерсе, дәл осындай денсаулық нысанының құрылысы ағымдағы жылы осы ауылдан да басталатын болады», - деді, аудан әкімі.

Ауыл халқы аудан басшысына өздерін толғандырған ұсыныс-пікірлерін жеткізіп, алдағы жұмыстарға сәттілік тіледі.

Халықпен жүздесу одан әрі Қарақұм ауылдық округінде жалғасты.

Алдымен аудан әкімі Абай елдімекеніндегі «Шаттық» мемлекеттік балабақшасындағы балғын бүлдіршіндермен кездесті. Одан соң, ауылдағы дәрігерлік амбулатория мен клуб нысанын аралады.

Жергілікті тұрғындармен өткен басқосуда Аманжол Сақыпұлы өңірде қордаланған мәселелердің кезең-кезеңімен шешілетінін және елдімекендердің инфрақұрылымдық жағдайларын жақсарту мақсатында жүргізілетін жұмыстарды жеделдету үшін тиісті шараларды қолға алатынын айтты.