Дөңгелек үстел мәжілісі өтті
Қызылордадағы «Болашақ» университетінде «Қазақ журналистикасының өзекті мәселелері» атты дөңгелек үстел мәжілісі өтті. Оқу орны мен жергілікті «Сыр медиа» ЖШС бірлесіп ұйымдастырған басқосуды университет құрылтайшысы, академик Бақберген Досманбетов ашып, саланың өткені мен бүгіні және алда тұрған мәселелер турасында әңгіме өрбітті.Университеттегі Рекрутинг және мансап орталығының жетекшісі Берік Саймағамбетов отырыстың мақсаты туралы айтып, «Сыр медиа» ЖШС директорының міндетін атқарушы Марат Аралбаев серіктестіктің қазіргі жай-күйі, ел дамуына үлес қосып келе жатқан журналистерді шығармашылық тұрғыда қолдау бағытындағы бастамалар туралы хабарлама жасады.
Былтырдан бері сараптамалық бағыттағы, эксклюзивті материал жазған газет тілшілерге тәуелсіз комиссия шешімімен ай сайын ақшалай жүлде беріліп келеді. Газеттер дизайны да сарапқа түсіп жатады. Басылымдар беттерінде қоғамдағы өзекті мәселелер қалыс қалып жатқан жоқ. Серіктестік биылдан бастап «Миллионер журналист» атты жобаны жүзеге асырмақшы. Жыл бойы барлық талапқа сай келіп, өнімді қызметімен көзге түскен серіктестік тілшісіне кәсіби мереке қарсаңында 1 миллион теңге табысталады.
Саланың өзекті мәселелерін талқылап, қоғамның қозғаушы күші ретіндегі БАҚ рөлін айқындауға арналған жиында филология, журналистика және тарих кафедрасының аға оқытушысы, филология ғылымдарының кандидаты Нұрлан Нұрмаханов оқу орнында болашақ журналистерді дайындау ісіне тоқталды. Оқытушылықтан бөлек «Әлімсақ» журналы мен «Ұстаз мәртебесі» газетіне жетекшілік ететін әріптесіміз 2012 жылдан бері «Болашақ» университетінен журналистика мамандығын 200-ден астам жас бітіріп шыққанын атап өтті. Олардың алды қазір еліміздің беделді ақпарат құралдарында қызмет етеді.
Жиында «Болашақ» университетінің оқытушысы, ардагер-журналист Айткүл Шалғынбаева журналистика менеджменті, мемлекеттік тапсырыс, БАҚ пен билік қарым-қатынасы жайында ой өрбітті.
– Мемлекеттік тапсырыс екі жаққа да тиімді болуы керек. Бұл жерде БАҚ еркіндігі, оқырман құқы да ескерілуі керек, – деді ол.
Ортақ тақырып аясында Қазақстан Журналистер одағы облыстық филиалының жетекшісі, облыстық «Сыр бойы» газетінің бас редакторы Қуат Шарабидинов те пікір-пайымын жеткізді.
– Кезінде мемлекеттік тапсырыс ұлттық баспасөзді дағдарыстан аман алып қалғанымен, әлі күнге қазақ журналистерінің мұң-мұқтажы толық шешіле қоймады. Дегенмен үміт үзілген жоқ. Қоғамдағы өзгерістер ақпараттық салаға соны леп әкеледі деп сенеміз. Әсіресе жазылым, жарнама және мемлекеттік тапсырыс аясында жұмыс істеп келе жатқан дәстүрлі БАҚ-қа жаңаша қолдау аса қажет, – деді ол.
Басқосу соңында журналистика кафедрасының студенттері түрлі сауал қойып, мамандармен пікір алмасты. Дөңгелек үстелге қатысқан қонақтар оқу ғимаратын аралап, мұндағы жаңалықтармен, білім берудің әдістемелерімен танысты.
Ақпарат көзі: egemen.kz
Фото: egemen.kz
