Көктемгі тасқыннан орталық және жергілікті билік сабақ алу керек - Қ.Тоқаев

Көктемдегі алапат су тасқыны ел үшін үлкен сынақ болды. Бұл оқиғадан орталық және жергілікті билік өкілдері сабақ алу керек. Бұл туралы Қ.Тоқаев бүгінгі Жолдауында айтты, деп жазады Egemen.kz.

Президент су тасқыны болған сындарлы шақта ынтымағы жарасқан ел екенімізді көрсете білген Қазақстанның әр аймағынан жиналған еріктілер мен жанашыр азаматтардың еңбегін ерекше тілге тиек етті.

«Қазақстанның әр аймағынан жиналған еріктілер мен жанашыр азаматтар зардап шеккен жұртқа көмек қолын созды. Менің елдік істен шет қалмау туралы үндеуіме ірі бизнес өкілдері де қолдау білдірді. Мемлекеттің батыл әрекеті мен халықтың өзара тілектес болуының арқасында аса қиын жағдайдан аман-есен өттік. Дегенмен орталық және жергілікті билік өкілдері осы оқиғадан сабақ алуы керек», деді Қасым-Жомарт Тоқаев.

Сондай-ақ, мемлекет басшысы ирригация жүйелері және жалпы су шаруашылығы мәселесімен мұқият айналысу қажет екенін ескертті.

«Қазіргі заманда біз кез келген қатерге дайын болуымыз қажет. Сондықтан қарғын суды жинап, диқандардың қажетіне жарату үшін оны дұрыс сақтай білген жөн. Гидрология бекеттерін жөндеп, жаңғырту қажет. Суды барынша үнемдеу жұмысын ұйымдастыру керек. Бұл – ең алдымен, ауыл шаруашылығына қатысты мәселе, яғни су үнемдеу технологиясын, әсіресе, ауыл шаруашылығында кеңінен қолдану қажет.

Су қорын жинап, оны тиімді пайдаланып, ирригация жүйесін дұрыс қолдана алсақ, бұл салаға да инвестиция тартуға болады. Сондықтан тариф саясатын реттеп, инвесторларға тиімді қолдау шараларын ұсыну қажет. Бұл – Үкіметтің алдында тұрған маңызды міндет. Нақты жұмысқа кірісу керек», деді Президент.

Сурет: egemen.kz