Бүгін – Орман шаруашылығы қызметкерлерінің күні
Елімізде орман шаруашылығы қызметкерлерінің күні дәстүрлі түрде қазан айының үшінші жексенбісінде атап өтіледі, деп хабарлайды BAQ.KZ тілшісі.Биылғы мереке 20 қазанға сәйкес келіп отыр. Бұл мереке орман шаруашылығымен айналысатын адамдар еңбегінің маңыздылығын және олардың елдің орман ресурстарын қорғауға және қалпына келтіруге қосқан үлесін атап өтуге арналған. Айтулы күні еліміздегі орман шаруашылығы саласына қысқаша шолу жасап көрген едік. 2017 жылдан бері тойланып келеді
2017 жылдан бері қазан айының үшінші жексенбісі Орман шаруашылығы қызметкерлерінің күні деп белгіленген. Бұл күні біз Қазақстанның ормандарына күн сайын қамқорлық жасайтын, олардың қорғалуына және өсімін молайтуға ықпал ететін адамдардың еңбегін атап өтеміз. Орман шаруашылығы қызметкерлері біздің табиғи байлығымыз бен экологиялық тепе-теңдігімізді сақтауға бағытталған маңызды миссияны орындайды. Олардың еңбекқорлығы мен кәсібилігі жауапты азамат – «Адал азаматтың» қасиеттерін бейнелейді.
Айта кететін жайт, елімізде 160 табиғат қорғау мекемесі мен кәсіпорны бар. Ол жерлерде 17,4 мыңға жуық орманшы жұмыс істейді.
"Таза Қазақстан" - жарқын болашақ
Биыл Қазақстанда Орман шаруашылығы қызметкерлерінің күнін мерекелеу «Таза Қазақстан» республикалық акциясымен бірігіп атқарылуда. Мәселен, мереке қарсаңында Қазақстан Республикасы Экология және табиғи ресурстар министрлігінің қызметкерлері мен ЮНИСЕФ экоактивистері ағаш отырғызу акциясын өткізді. Астана қаласында «Хан Шатыр» СОО аумағында 100 ағаш (емен, үйеңкі, шетен) отырғызылды. Ал Ботаникалық баққа 500 ағаш (алма, мойыл, ырғай, ұшқат, тал) егілді. Астана қаласындағы 60 мектепте, 40 балабақшада және 8 жайлы мектепте 2 500 ағаш отырғызылды (сібір алма, Виргин мойылы және дөңгелек жапырақты ырғай көшеттері).
Орман көбейсе, экономика ілгерілейді
Қазақстанның табиғи алуан түрлілігіне қарамастан, ормандар ел аумағының 5%-ын ғана алып жатыр. Ормандардың көбеюі экологиялық тепе-теңдікті сақтау және елдің одан әрі тұрақты әлеуметтік-экономикалық прогресі үшін өте маңызды. Мемлекет басшысы өзінің президенттігінің алғашқы күндерінен бастап осы мәселеге ерекше назар аударғанын атап өткен жөн. Сондай-ақ Президент орман алқабын ұлғайту бүкіл елді жұмылдыратын нағыз халықтық идеяға айналуы тиіс екенін, сондықтан елде ауқымды ақпараттық-түсіндіру жұмыстарын жүргізу қажет екенін атап өтті.
Орман қорына – 2 млрд ағаш
Президент Қасым-Жомарт Тоқаевтың тапсырмасы аясында Экология және табиғи ресурстар министрлігінің Орман шаруашылығы және жануарлар дүниесі комитеті орман қорына 2 млрд ағаш отырғызу мақсатында облыстарда кешенді жоспарларды іске асыру бойынша жұмыстар жүргізіліп жатыр.
Мемлекет орман шаруашылығы саласын дамыту үшін көбірек қадамдар жасауда. Елде орман шаруашылықтарын, ұлттық парктер мен резерваттарды өртті ерте анықтаудың арнайы өртке қарсы жүйелерімен, техникамен және жабдықтармен жарақтандыру бойынша үлкен жұмыс жүргізілуде. Мәселен, ағымдағы жылы еліміздің орман шаруашылығы тарихында алғаш рет 1384 бірлік өртке қарсы техника мен 921 бірлік тіркеме және аспа жабдықтарын сатып алуға 52 млрд теңге бөлінді. Бұдан басқа, орман өрттерін ерте анықтау жүйесімен 900 мың гектардан астам мемлекеттік орман қоры қамтылған. Оның тиімділігі «Бурабай» ұлттық паркінің мысалында дәлелденді, онда орман өрттерінің орташа ауданы 50 есе қысқарды.
"Семей орманына" - 3,1 млрд теңге
Келесі жылы осындай жүйе «Семей орманы» резерватында 3,1 млрд теңге сомасына енгізілетін болады.
Мемлекет орман қорын қорғаудан басқа, орман шаруашылығықызметкерлерін әлеуметтік қолдауға көп көңіл бөледі.
Осылайша, 2024 жылғы 1 шілдеден бастап еліміздің орман өрт сөндіру станцияларының қызметкерлері лауазымдық жалақыға үстемеақы ала бастады, олардың ішінде: орман өрт сөндірушілері, өрт сөндіру машиналарының жүргізушілері, тракторшы-машинистер, радиооператорлар, өрт сөндіру машиналарын, жабдықтар мен аппаратураларды жөндеу жөніндегі слесарлар, өрт-бақылау мұнарасының бақылаушылары.
Сондай-ақ авиациялық күзет өрт сөндіруші – 113 десантшының жалақысы көтерілді. Барлығы 3,3 мыңға жуық қызметкер қосымша ақымен қамтылатын болады.
Табиғатты қорғау – барша адамзаттың борышы
Бұл күнге тек кәсіпқойлар ғана емес, табиғатты қорғаудың маңыздылығын түсінетін барлық азаматтардың қатысуы маңызды. Көгалдандыру және ормандарды тазарту бойынша бірлескен акциялар жақсы дәстүрге айналуы керек. Бұл сонымен қатар жұртшылықтың назарын ормандарды сақтау мәселелеріне және табиғи ресурстарға жауапкершілікпен қарау қажеттілігіне аударудың тамаша мүмкіндігі.
Орман шаруашылығы тек жұмыс емес, бұл болашақ ұрпақ үшін табиғатты сақтау және қалпына келтіру миссиясы. Бүгін біз ормандарымызға күнделікті қамқорлық жасайтындарды құрметтейміз. Біздің ормандарымыздың болашағы орманшылардың жұмысына, демек, елдің экологиялық әл-ауқатына байланысты екенін есте ұстауға тиіспіз. Біздің ормандарымыз Қазақстанның ұзақ жылдар бойы жасыл байлығы болып қалуы үшін орман шаруашылығын қолдауды және дамытуды жалғастыру маңызды.
Әрбір орманшының еңбегі – болашақ ұрпаққа үлгі
Ормандар экожүйені сақтауда шешуші рөл атқарады, климат пен ауа сапасына әсер етеді. Орманшылардың еңбегінің арқасында біздің ормандарымыз сау және өнімді болып қала береді. Орман шаруашылығы қызметкерлерінің күні – қоршаған ортаға қамқорлық жасау және болашақ ұрпақ үшін орман ресурстарын сақтау қаншалықты маңызды екенін еске салады. Орман шаруашылығы қызметкерлері жастарды үлгі алуға және табиғатты қорғауға үлес қосуға шабыттандырып, өз тәжірибелері мен білімдерін жаңа ұрпаққа береді.
Орман шаруашылығы қызметкерлерінің күні – бұл әрқайсымыздың табиғатқа ұқыпты қараудың маңыздылығын есте сақтау мүмкіндігі. Орман қорын сақтау және көбейту үшін әрбір қазақстандық ормандарды көгалдандыру және қорғау жөніндегі акцияларға белсенді қатысуға тиіс.
Әрбір орман шаруашылығы қызметкерінің еңбекқорлығы – еліміздің жасыл болашағының кепілі.
Орман шаруашылығы қызметкерлерін мерекемен құттықтаймыз!
Ақпарат көзі: baq.kz
Сурет: ашық дереккөз
