АЙМАҚ КӨШБАСШЫЛАР ҚАТАРЫНДА

Бүгінде Қызылорда облысының әлеуметтік-экономикалық дамуында өсім қалыптасты. Бұл жайында облыс әкімі Нұрлыбек Нәлібаев Орталық коммуникациялар қызметінің Қызылордада өткен көшпелі брифингінде хабарлады. Аймақ басшысы атқарылған жұмыстар мен алдағы уақытта қолға алынатын жобалар туралы баяндап, «Бүгінгі күні Президентіміздің, Үкіметтің ерекше қолдауының арқасында облысымыздың бюджеті 744 млрд теңгеден асты. Осыдан екі жыл бұрын 364 млрд теңге болатын. Өсім 204,4 пайызды құрады. Бюджетіміздің 55,4 пайызы әлеуметтік салаға бағытталған. Облыстың даму бюджеті соңғы 2 жылда 3,6 есе артты" деп атап айтты. Биыл 10 айдың қорытындысымен өңірлер арасында көшбасшылар қатарынан көрінген облысымыз өнеркәсіп өндірісі – 0,8, өңдеу өнеркәсібі – 22,8, ауыл шаруашылығы – 3, құрылыс жұмыстарының көлемі – 50, тұрғын үй – 7,4, көлік – 3,5, сауда – 6,5 пайызға өсім көрсеткен. Бұл көрсеткіштің өсіміне Арал ауданында істеліп жатқан жұмыстардың оң ықпалы бар. Нақтырақ айтар болсақ шыны зауытының жұмысына тоқталған Н.Нәлібаев:«2022 жылы іске қосылған шыны зауыты тұрақты өнім шығарып, оның 70%-ын ішкі нарыққа, 30%-ын Өзбекстан, Қырғызстан, Тәжікстан, Грузияға және Ресейге экспорттауда. Зауыт іске қосылғаннан бері 37 млрд 100 млн теңгенің 28 млн 700 мың шаршы метр шынысын өндірді. Қазіргі таңда мұнда 400-ге жуық адам еңбек етеді. Биыл шыны зауыты жанынан шетелдік инвестордың 15 млн. АҚШ доллар қаржысына жылына 5 млн шаршы метр энергия үнемдейтін шыны өндіру жобасы іске қосылды. «Өндіріс» индустриялық аймағында шыны зауытының айналасынан ілеспе кәсіпорындар құру қолға алынды. Атап айтқанда, «Айна Гласс» серіктестігінің құны 1 млрд 500 млн теңге, жылдық қуаттылығы 720 мың шаршы метр айна өндіру жобасының құрылысы басталды. Сонымен қатар, «Horn glass» неміс технологиясымен жылына 220 млн бөтелке өндіру, жылдық қуаттылығы 22 мың 600 шаршы метр шыңдалған шыны (стеклопакет) өндірісін кеңейту жобаларына тиісті жер телімі бөлініп, жобалау жұмыстары басталды, – деді.
«Ауыл аманаты» жобасы аясында Қызылорда облысында 575 жоба жүзеге асырылған. Бұған «Биыл 4 млрд 596 млн теңгеге 575 жобаны жүзеге асырып 610 жаңа жұмыс орнын ашу жұмыстары жүргізілуде. Бүгінгі күні 1 млрд теңгеге 150 жоба қаржыландырылды», – деген аймақ басшысының сөзі дәлел бола алады.
Тағы бір жаңалық Қызылорда облысында алғашқы «Жайлы мектеп» ашылу болды. «Өткен жылдан бері облыста 1 мың 720 орындық 6 мектеп,1 мың 850 орындық 4 мектепте қосымша ғимарат салынып, ел игілігіне табысталды. 2024 жылы жаңадан 3 мектеп, 5 мектепке қосымша құрылыс салынып, пайдалануға берілді.«Жайлы мектеп» ұлттық жобасы аясында салынған мектептердің алғашқылардың бірі болып 900 оқушыға арналған білім ордасы облыс орталығындағы жаңа шағын ауданнан ашылды» – деді Н.Нәлібаев.
Айта кетейік, соның екеуі біздің ауданда салынып жатыр. Мұндай жаңалық елдегі дамудың жоғары деңгейде екенін көрсетеді. Интеллектуал жастардың ортақ мекеніне айналар жайлы мектептің Аралда жұмыс істейтін күн де алыс емес деп ойлаймын.
Орталық коммуникациялар қызметінің Қызылордада өткен көшпелі брифингі барысында мұнан бөлек көптеген саладағы басымдықтар мен жетістіктер тілге тиек етілді. Жол құрылысы, тұрғын үй, медицина, өзге де салалардағы серпінді жұмыстардың нәтижесі айтылған баспасөз жиыны алдағы уақытта да қарқынды жұмыстардың толастамайтынына көзімізді жеткізді.

Оңталап ЖОЛДАСОВ