Үкіметке зор жауапкершілік жүктелді

Президент Қасым-Жомарт Тоқаев Үкіметтің кеңейтілген оты­рысын өткізді. Бұл – жылдың басындағы аса қажетті жиын. Елдегі экономикалық жағдай сарапқа салынды. Мемлекет басшысы түйінді сөзінде Үкіметтің және басқа да құзыр­лы органдардың жақын арадағы негізгі міндеттеріне тоқ­талды.

«Инвесторлардың мәселесін шұғыл шешу үшін инвестиция штабы құрылды. Соның арқа­сында бюрократиялық ке­дергі­лер мен құқықтық қа­рама-қайшылықтар жойылып, кейбір жобаларды тезірек жүзеге асы­руға жол ашылды. Алайда басты мақсат – «жекелеген» проблемаларды ғана шешпей, елдегі тұтас инвес­тициялық ахуалды жақсарту», деді Президент.

Біздің Үкіметке жетпей жат­қан бір іс болса – осы. Әр жер, әр өңірде нәтижелі жұмыс бар. Бірақ мәселеге тұтас қарау, ор­тақ ше­шімдер қабылдау, министр­ліктер жұмысын бір­лесе отырып үйлестіру жағы жетіспейді. Мұны Мемлекет басшысы қадап тұрып айтты.

«Инвестициялық жоба­ларды әзірлеу барысында ве­дом­ст­во­аралық үйлестіруге әлі де көп уақыт кетеді. Үкімет басы артық бюрократиядан арылып, жедел жұмыс істеуі керек», деді.

Сырттай қарасаңыз, Үкімет жаппай жұмылып жұмыс істеп жатқан сияқты. Апта сайын Үкімет отырысы өтеді. Премьер-министр тапсырма береді. Шапқылап жүрген бір адам. Ал нәтиже қандай? Берілген тапсырма орындалды ма? Орындалмаса неге орындалмады? Сұрау жоқ секілді. Тап­сыр­малар бар. Тиянақты орындау жағы аз. Сұрау, бақы­лауға алу, өз міндеттерін дұрыс атқармағандарды жауапқа тарту жағы байқал­майды. Осы қалыппен кете берсек, бәрі жай әшейін сөз түрінде қа­лады. Сон­дықтан «белбеуді бууға бел керек». Жедел шешім қабылдауға ер керек. Жауап­кершілікті өз мойнына ала білу деген талап орнықса дейміз.

Осы уақытқа дейін экономиканы дамыту үшін «клас­тер керек» дедік. Одан кейін «инновация керек» дедік. Сосын «индустриализация керек» дедік. Қанша миллиард қаржы кетті соның бәріне. Жауап берген біреу бар ма?

Президент тағы да қайт­алап айтып жатыр: «Мемле­кет­тік қызметшілердің құ­лық­­сыздығы және жауап­кер­шілік алудан тайсалуы келісу рәсімдері мен шешім қабылдаудың тым ұзақ­қа созылуына себеп болып отыр. Мұны ашық айтқан абзал».

Құлықсыздықтан қалай құ­ты­ламыз? Жауапсыздықты қа­лай реттейміз? Дербес шешім қабыл­дауға қашан көшеміз? Үкі­меттің ендігі жұмыс сапасы ең алдымен осы сауалдарға жауап беруіне тікелей байланысты.

Нұртөре ЖҮСІП,

Сенат депутаты

Ақпарат көзі: egemen.kz
Сурет: ашық дереккөзден алынды