Наурыз мерекелеріне дайындық жұмыстары пысықталды

Наурыз – көктемнің лебін әкелетін ғана емес, халықтың бірлігі мен мәдени дәстүрлерін дәріптейтін ұлық мереке. Бұл айда ұйымдастырылатын мерекелер қоғамдағы татулық пен ынтымақты нығайтуға бағытталады. Әрбір шара – өткеннен сыр шертетін, болашаққа бағдар беретін құндылықтарды қамтиды.

Бүгін аудан әкімдігінің мәжіліс залында көркемдік кеңес кезекті отырысы өтті.

Отырыста алдағы мерекелерге дайындық жұмыстары тағы бір пысықталды. Биыл 8-наурыз Халықаралық әйелдер күні мен 22 наурыз Ұлыстың Ұлы күніне орай қалыптасқан дәстүр аясында аудан көлемінде бірқатар ауқымды іс – шаралар өткізілмек. Ұйымдастырылатын шаралар да жұмысшы мамандықтарға басымдық беріледі.

Былтырдан бері елімізде «Наурыз мейрамын атап өтудің тұжырымдамасы» қабылданған. Соған сәйкес Наурызнама онкүндігі 14-23 наурыз аралығында өтеді. Биыл да Наурызнама онкүдігінде әр күнге арнайы тақырыптар бекітілді. Осы бағытта аудан көлемінде 50-ге жуық шара өткізу жоспарланған. 14 наурыз – «Көрісу күні - Амал мерекесі» атап өтуден «Наурыз» мейрамын тойлау бастау алады. 15 наурыз – «Қайырымдылық күні», 16 наурыз – «Мәдениет және ұлттық салт-дәстүр күні», 17 наурыз – «Шаңырақ күні», 18 наурыз – «Ұлттық киім күні», 19 наурыз – «Жаңару күні», 20 наурыз – «Ұлттық спорт күні», 21 наурыз – «Ынтымақ күні», 22 наурыз – «Жыл басы», 23 наурыз – «Тазару күні» наурызнаманың қорытынды күні жалпыұлттық экологиялық акция ұйымдастырылып, «Тазалық эстафетасы» басталады.

Кеңес қорытындысы бойынша айтылған ұсыныстар негізге алынып, аудан әкіміне ұсынылды.

Арал ауданы әкімдігінің баспасөз қызметі