Облыс әкімі құрылыс нысандарын аралады

Кеше облыс әкімі Нұрлыбек Нәлібаев қала аумағындағы құрылыс нысандарын аралап, алдымен «Көрме залы» орталығының құрылыс алаңына барды. Одан кейін нан, кондитерлік және макарон өнімдерін өндіретін кешендегі жұмыспен танысты. Бұл жобаға мемлекеттік қолдау ретінде 5 гектар жер беріліп, су және кәріз жүйелерін жеткізуге қаржы қарастырылған. Сонымен бірге, технологиялық жабдықтарды импорттау кезінде кедендік баж салығынан босататын инвестициялық келісім-шарт жасалған. Жобаның І кезеңі биыл іске қосылады. Қазіргі таңда жұмыстың 80 пайызы орындалған. Нысанда 30-дан астам жұмысшы еңбек етуде, 10-нан астам техника бар.

Сол жағалаудағы жаңа стадионның шығыс және батыс трибуналарының металл конструкциялары орнатылып, қабырғалары мен ішкі бөліктері, сыртқы витраждары қалануда. Жылу, су, электр, желдету желілері тартылуда. Қазіргі кезде футбол алаңын жабдықтау және аумақты абаттандыру жұмыстары қолға алынған.

Физика-математика мектеп-интернатында ішкі әрлеу жұмыстары аяқталуға жақын. Нысанда техникалық жабдықтау мен аумақты абаттандыру қатар жүргізілуде. Құрылыс басында 150 жұмысшы мен 20 техника бар.

Аймақ басшысы тарихи-мәдени мұра орталығы мен музыкалық колледж ғимаратының құрылыс барысын да көрді. Оқу орнының ғимараты былтырдан бері «Саутс Ойл» компаниясының демеушілігімен салынуда. Бас мердігер «Алтын Констракшн» ЖШС жұмысқа 142 жұмысшы, 4 техника тартқан. Қазір қасбетті әрлеу, су, газ, кәріз жүйелері және электрмен жабдықтау жұмыстары аяқталуға жақын.