Конституция – ел бірлігінің айнасы

Кеше Арал аудандық мәдениет үйінде Қазақстан Республикасы Конституциясының 30 жылдық мерейтойына арналған «Конституция – ел бірлігінің айнасы» атты салтанатты мерекелік кеш өтті.

Шараның шымылдығы мерекеге сай безендірілген сахна төрінде түріліп, LED-экраннан тарихи қойылымдар көрсетіліп, көрерменді бірден өткен күндерге жетеледі. Шара басталғанда жарық сөніп, фанфар үнімен әсерлі театрландырылған пролог ұсынылды. Көріністе қазақтың ұлы ханы – Қасым хан бейнесі жаңғырып, «Қасым ханның қасқа жолы» заңдар жинағының тарихы мен мән-маңызы көркем түрде сахналанды. Қобыздың қоңыр үнімен өрілген көрініс елдік пен әділдіктің мәңгілік құндылығын паш етіп, көпшілікке ерекше әсер сыйлады.

Салтанатты кештің шарықтау сәтінде сахнаға жалынды жасұландар шығып, елдіктің, бірліктің символы ретінде ҚР Конституциясының 30 жылдық логотипі бейнеленді. Өнерпаздар орындауындағы «Жалғызым қазақ» әні көрермен жүрегін елжіретіп, артынша аудан бишілерінен «Тойға шашу» биі сахнаның сәнін кіргізіп, мерекелік көңіл-күйді арттыра түсті.

Кеш барысында мемлекеттік рәміздерге ерекше құрмет көрсетілді. Құрмет қарауылы сахнаға Мемлекеттік Туды алып шығып, барша зал орнынан тұрып, Қазақстан Республикасының Әнұранын зор ықыласпен шырқады.

Шараның ресми бөлігінде аудан әкімі Аманжол Сақыпұлы Оңғарбаев құттықтау сөз сөйлеп, Конституцияның ел тәуелсіздігін нығайтудағы тарихи рөліне тоқталды. Сондай-ақ мемлекеттік қызметке жаңадан қабылданған жас мамандар салтанатты түрде ант беріп, өздерінің ел алдындағы жауапкершілігін айқындады. Бұл сәт жиналған қауымның зор қошеметіне бөленді.

Мерекеге орай облыс және аудан әкімдерінің Алғыс хаттарымен бірқатар азаматтар марапатталды. Олардың қатарында ауданның әлеуметтік-экономикалық дамуына, қоғам тынысына белсене атсалысып жүрген еңбек озаттары, мемлекеттік қызметкерлер мен жастар белсенділері бар. Марапат иелерін сахна төрінде қошеметпен қарсы алып, естелік суреттер түсірілді.

Кештің келесі бөлігі мерекелік концертке ұласты. Сахна төрінде республикалық байқаулардың жеңімпаздары мен аудан өнерпаздары өз өнерлерін паш етті. «Елге арнау», «Туған ел», «Атамекен» сынды елдік пен бірлікті дәріптеген әндер әуелеп, халықтың жүрегін патриоттық сезімге бөледі. «Ақтолқын» би ансамблі мен «Шаттық» би тобының ұлттық билері де көрермен көңілін көтеріп, мерекелік сән-салтанатты толықтырды.

Салтанатты кештің финалында «Атамекен» әні орындалып, сахна сыртынан әсем отшашулар жарқырап, зал толы жұртшылықты ерекше қуаныш пен мақтаныш сезіміне бөледі.

Конституция – ел тәуелсіздігінің берік тұғыры, әділдіктің асыл арқауы, бірліктің айнасы. Арал жерінде өткен бұл мерекелік шара халық жүрегінде тәуелсіз елдің жарқын болашағына деген сенім мен отансүйгіштік рухты одан әрі күшейте түсті.