Күзде 23 мыңға жуық азамат мерзімді әскери қызметке шақырылады

Қазақстанда күзгі әскерге шақыру науқаны басталды. Қалалық және аудандық шақыру комиссиялары жұмысқа кірісті, - деп хабарлайды Massaget.kz тілшісі.

Кімдер шақырту алады?

Қорғаныс министрлігі мәліметінше, желтоқсанның аяғына дейін әскерден кейінге қалдыруға немесе әскери қызметтен босатылуға негізі жоқ 18 бен 27 жас аралығындағы 23 000-ға жуық ер азамат мерзімді әскери қызметке шақырылады.

Олар қайда барады?

Олардың ішінде 12 000-нан аса адам Қарулы күштер, 7 000 адам Ұлттық ұлан, 3 000 адам ҰҚК Шекара қызметі, 400-ден аса адам Төтенше жағдайлар министрлігі, 300-ге жуық адам Мемлекеттік күзет қызметі қатарын толықтырады.

Сарбаздарға қандай мүмкіндік беріледі?

Әскери қызметшілер әскери мамандықпен қатар, еңбек нарығында сұранысқа ие 20-ға жуық мамандықты тегін меңгере алады. Олардың қатарында жүргізуші, байланыс маманы, парамедик, экскаваторшы және тағы басқалары бар.

Фото: massaget.kz

Бұдан бөлек, сарбаздарға әскери қызмет кезінде несие төлемін кейінге қалдыру және ҰБТ тапсырмай-ақ мемлекеттік білім гранты бойынша жоғары оқу орындарына түсу мүмкіндігі қарастырылған.