Тұрғындар талабы: мәселенің шешімі қандай?

Көптен бергі халықтың көкейінде жүрген сауалдардың бірі – қала шетіндегі жер астынан шығып жатқан су болатын. Жаз шықса балалардың ойнап, малдардың су ішетін ортасына айналған жердің тазалыққа зиянынан бөлек, шекарасы кеңейіп, сол маңға жақын салынған тұрғын үйлерге де келтірер кедергісі өте көп. Бұл мәселе қала тұрғындары мен аудандық мәслихат депутаттары тарапынан бірнеше рет жауапты орындардың назарына ұсынылып жүрді. Мәселенің мәніне ұңіліп көрдік.
Иә, жер астынан шығып жатқан судың айна­ласы жоғарыда айтып өткеніміздей мал­дың су ішетін аймағына айналған. Жаз маусы­мы кезінде суат іздеген ірі қара малдан бастап, уақ малға дейін суға ағылатын. Ал, ойын қу­ған балалардың малдардың жатқан жерінде шомылуы тіпті тазалыққа сәйкес келмейді. Ересектердің өзі бұған мән бермей, жиналған судың басына барып, «дем алатын» кездері де өте көп кездеседі.
Сынған шынылар, су басындағы шу, бала­лар­дың лас аумақта ойнауы көпшілікті алаң етіп келген. Тіпті десеңіз, жиналған су айнала­сын­дағы тұрғын үйлердің жанына дейін жетіп, қара жерге сіңген судың кесірінен әжетхана қазуға да мүмкіндіктері болмайтындай дәре­жеге жетті.
Осының барлығы қала азаматтарының на­за­рында болып, көше комитеттерінің төра­ғасы А.Жолмағамбетов пен аудандық мәслихат де­путаты А.Асанбаев қала әкімі Б.Махатовтың тарапына хат та жазды. Аудан басшысы да бұл қиындықтан хабардар болды.
Халықтың ұсынысы қашан да билік тара­пынан тыс қалған емес. Міне, бұл мәселе де жақында шешімін тауып, тұрғындардың көп­тен бергі сұрағы қанағаттандырылды.
Нақтырақ тоқталар болсақ, жер астынан шы­ғып жатқан ағын судың жиналып, сор­ла­нып кеткен аумағы толықтай қоршалып, су­дың көзінен бастап 1 шақырым қашықтыққа дейінгі жерге қала әкімдігі мен «Арал тынысы» мекемесінің жұмысшылары арнайы арық қазды.
Арал қаласының әкімі Б.Махатов:– Бұл мәселенің айналасындағы тұрғын­дар­ға қиындық тудырып келе жатқанынан көп­тен бері хабардармыз. Адам денсаулығы, олардың қауіпсіздігі, өтініші әркез біздің на­зар­дан тыс қалған емес. Бақылаудан шығып, айналасына бейберекет жайылып жатқан су­дың аумағы қазірде құрғап келеді. Біз судың арнасын бұрып, арнайы қазылған арық арқылы жанынан өтіп жатқан жолдың келесі бетіндегі теңіздің құрғаған табанына ағатындай жағдай жасадық, – дейді.
Бардық, көрдік. Көңілден шықты. Көп жыл­дар бойы көлге айналып жататын аумақ­тың орнындағы су тартылып, қазылған арық­ты қуалай ағып жатыр. Жолдың асты­нан жүргізілген темір құбыр арқылы теңіз­дің кепкен табанына кетіп жатқан суды көргенде, тұрғындар талабының қанағат­тан­дыры­лға­нына қуанып-ақ қалдық.
Тағы бір айта кетерлігі, арық пен су айна­ласының тазалығы да жіті қадағалауға алын­ған. Осы уақытқа дейінгі қиындықты түбегейлі жоюға бағытталған жұмыстар нәтижесінде та­залықты сақтауға 2 қоғамдық жұмысшы ар­найы бекітіліпті.
«Біткен істің міні жоқ, бітірген ердің кемі жоқ» демей ме?! Олай болса, қала хал­қы­ның көкейіндегі сауалына шешімін тап­қан азаматтарға біздің де алғыстан басқа айта­ры­мыз жоқ.
Оңталап ЖОЛДАСОВ