Тіліміз үшін жасалған игі қадам
Мемлекет басшысы «Болашаққа бағдар: рухани жаңғыру» атты бағдарламалық мақаласында 2025 жылдан бастап латын әліпбиіне көшуге кірісуіміз керектігін және болашақта барлық саладағы іс-қағаздар мен оқулықтар да осы қаріппен жазылуы тиіс екенін қадап айтқаны көптің есінде болар. Сондай-ақ, үкіметке қазақ тілін латын әліпбиіне көшірудің нақты кестесін жасауды тапсырып, уақыт ұттырмай бұл жұмысты қазірден бастан қолға алу қажеттігін алға тартты. Міне, уақыт төрешілік ететін бұл жұмыстар да кезең-кезеңімен жүзеге асырылып келеді. Оған дәлеле ретінде жақында ғана Елбасы «Қазақ тілі әліпбиін кириллицадан латын графикасына көшіру туралы» Қазақстан Республикасы Президентінің 2017 жылғы 26 қазандағы №569 Жарлығына өзгеріс енгізгендігін айта аламыз. Шындығында, бұл мәселе қазіргі таңда уақыт күттірмейтін деңгейде. Өйткені, тәуелсіз елдің негізгі белгілерінің бірі ретінде латын әліпбиінде жазудың маңызы орасан. Осы ретте тағы да Елбасымыздың «біз орыс тіліне қарсы емеспіз, біз оның қазақтар арасына қалай енгізілгеніне келіспейміз» деген сөзі еліміздегі осынау бастамаға түбегейлі дәлел бола алатындай. Иә, заман алмасып, уақыт керуені алға жылжыған сайын біз кемшіліктерге түзету енгізіп, қолданыстан шыққан құндылықтарымызға қайта оралып келеміз. Біздің латын әліпбиіне көшуіміз сол құндылықтармен қайта қауышуымызда болып отыр. Алдағы уақытта латын әліпбіндегі сөздер еліміздегі мектептерде кезең-кезеңімен оқытыла бастайды. Біз осылайша 2025 жылға қарай латын әліпбиіне көшу мәселесін барлық салаларда қамтитын боламыз. Бұл Елбасы тарапынан да қолдау тауып, қолданысқа еніп отырға маңызы басым ауқымды дүние.
С.Сыдықов,
№263 орта мектеп директоры.
