Қазақтың қолөнерін қастерлеген

«Шебердің қолы ортақ». Расымен де солай. Олай болатыны кез келген шебер немесе кәсіп иесі көз майын тауысып жасаған туындысымен ұлтының салт-дәстүрін, бітім-болмысын өзгелерге паш етеді. Сол арқылы өз халқының тарихы, бүгіні мен келешегінен сыр шертеді. Сондықтан да осынау дарынды жандардың тарапына қандай ізет білдірсек те артық емес.Теңіз төскейінде өздері дайындаған керемет бұйымдарымен жұртшылық ықыласына бөленіп жүрген қолөнершілердің тұтас қауымы қалыптасқан. Олардың арасында есімдері елімізден асып, шет мемлекеттерге тараған танымал тұлғалар да, бабалардан мұраға қалған киелі кәсіпке енді бет бұрған талапкер өрендер де бар. Десе де баршаны қазақтың қолөнерін ұрпақ зердесіне терең сіңірсек деген игі мүдде тоғыс­тыратыны   даусыз.
Арал қолөнершілерінің тізімі­нің басында Қазақстан суретшілер одағының мүшесі Құдайберген Құлманбетов тұр. Тектілік перзент бойына әкенің қаны, ананың сүтімен даритыны ғылыми тұр­ғыда дәлелденген. Өнер қонған әулетте дүниеге келген Құдайбергеннің қолөнерге деген қызығушылығы балалық шағынан бастау алды. Сонау оқушы күндерінде-ақ өзі дәріс алған №13 Т.Г.Шевченко атындағы мектепте «Суреттер полотнасы» атты жеке көрмесі көпшілік назарына ұсынылды. Осындайда балауса дарынның талаб­ын ұштаған, өзіне деген сені­мін нығайтқан білім ордасының басшылары, ұстаздардың көре­генділігіне еріксіз сүйсінесің.
«Қанат ұшса қатаяды». Сол мектеп қабырғасынан өрбіген Құдайбергеннің қадамы сәт санап шыңдалды. Бүгінгі таңда өзі де сан шәкіртті қолөнердің қыр-сырына баулыған тәлімгер. Айтуға оңай. Әсірелеп жеткізсек, бейнеті инемен  құдық қазғаннан бетер өнерді меңгеруге жүйкесі темірдей адам қажет. Оған көкейдегіні жан­дүниесімен сезінетін аса нәзік түйсікті, қиядағыны шалатын қырағы назарды қо­сыңыз. Қолөнерші азамат «Мұрагер» атты жеке шеберханасының жұмысын жол­ға қойған. Яғни, жеке кәсіпкер ретінде тір­келген. Аталуының өзінен бабалар мұрасына деген адалдық аңғарылатын шеберхана аудан тұрғын­дарына  жақсы  мәлім.
Құдайбергеннің жеткен жетіс­тігін санамаласаңыз, есебінен жаңы­ласыз. Ол Қызылордада өткен конкурстың «Халықтық көркем кәсіпшілік» саласы бойынша лауреаттығын жеті жыл қатарынан жеңіп алды. Президент мәдениет орталығында ұйымдастырыл­ған қазақстандық ІІІ «Шебер-2011» конкурсының «Озат іскер» номинациясының жеңімпазы атанып, Малайзия еліне жолдама иеленді. Әр жылдары ауданның «Жылдың үздік қолөнер шебері», «Жылдың үздік зергері» атанды. Бірнеше мәрте аудан әкімінің диплом, Алғыс хаттарымен марапатталды. Аудандық, облыстық, республикалық, аймақтық, Орта Азия, БҰҰ-ның халықаралық көр­мелеріне қатысты. Жүлделерге­ ие болды. Оның қолынан шыққан бұйымдары Атырау, Ақтөбе, Қы­зылорда, Қазалы, Арал музейле­рінде жәдігерлікке алынған. Бір­неше жұмыстарына шетел азаматтары қызығушылық танытты. Оның қолөнер бұйымдары алыс-жақын жерлерден келген қонақ­тарға кәде-сый ретінде табыс етіледі.
«Елдің атын ер шығарады» деген­ осы.