Жас өнерпаздар жарады
Аудандық психологиялық-педагогикалық түзету кабинетінің ұйымдастыруымен «Жұлдызай» облыстық ерекше балалар арасында өнер фестивалі өтті. Сайысқа оқушылар үйінің қолөнер және дизайн жетекшісі Әділбек Изнатов, өнер мектебінің әуен жетекшісі Алтын Омарова, мәдениет үйінің би үйірмесі жетекшісі Мәншүк Шатуова әділ қазылық етті. Барлығы 24 бала өнер көрсеткен шара көздің жауын алатын көрмемен ашылды. Көрмеде балалардың өз қолымен жасаған түрлі бұйымдары ұсынылды. Шараға жиылған көрермендер талантты балалардың әсем әуенін тыңдап, мың бұрала билеген бишілердің өнерін тамашалады. Сонымен қатар, өнерлі балапандар Астананың 20 жылдығына арнап флешмоб биін ұсынды. Жыл сайын өтетін дәстүрлі фестивальге жеке кәсіпкер Жамбыл Қараев, Ардақ Төлебаевпен қатар, «Жанұя», «Арзан» сауда орталықтары демеушілік жасады. Балалардың өнерге деген қызығушылықтары артып, талпыныстары оянды. Додада бақ сынасқан әрбір талант иелері үздік деп танылып, Алғыс хат және бағалы сыйлықтармен марапатталды. Шара соңында аудандық психологиялық-педагогикалық түзету кабинетінің меңгерушісі Жанар Ибраимова өмірдің қиындықтарына мойымай, мұндай талантты балаларды тәрбиелеп өсірген ата-аналарға алғысын жеткізді.
Балалардың қоғаммен етене байланысуы олардың тезірек сауығып кетуіне себепші. Сондықтан, мұндай балалар ешқашан оқшауланбауы тиіс. Оларға қолдау көрсетіп, өмірге деген құштарлығын арттыру – біздің міндетіміз.
Балауса Төребай
