Аралда қолөнер шеберлері арасында байқау өтті
Бүгін ел Тәуелсіздігінің 30 жылдығы аясында аудандық қолөнер шеберлері арасында «Қолөнер – сырлы өнер» тақырыбында байқау өткізілді.Аудан әкімдігінің қолдауымен аудандық мәдениет үйінде өткізілген шараға аудан әкімі Серік Сермағамбетов, аудандық мәслихат хатшысы Базарбай Төрахметов, аудандық ардагерлер кеңесінің төрағасы Әділбек Әйімбетов және бір топ қолөнер жанашырлары мен БАҚ өкілдері қатысты.Тегінен теңізді өлкенің қасиетін бойына сіңіріп, ата-бабамыздан қалған ұлттық өнердің өлмеуіне тер төгіп жүрген 30 шақты қолөнершілердің басын қосқан байқауда алдымен таланттардың төл туындылары кеңінен таныстырылып өтті. Байқау барысында таза табиғи өнімдерден әзірленген түрлі бұйымдарын ұсынып, кеңінен түсіндіріп өткен шеберлер қастерлі Тәуелсіздігіміздің 30 жылдығына арнаған туындыларын да ерекше ықыласпен ортаға салды.
Аудандық деңгейде өткен көрмеде ұлттық оюмен өрнектелген жастық, көрпеше, қазақы нақыштағы камзол, сәукеле, киіз-үй жабдығы, жүннен жасалған түрлі бұйымдары қойылды. Сонымен қатар ағаш ұсталарының көз сүрінер сұлулыққа толы естелік кәдесыйлары көрме қонақтарының назарына ұсынылды. «Шебердің қол ортақ» демекші қолөнершілердің төл туындыларынан ұлттық болмыс сезіліп, терең мағына беретіні айқын көрінді.
Байқауда сөз алған аудан басшысы «Қазақ ұлтының қолөнері, ою-өрнегі ғасырлар қолтаңбасы, ата-бабалар тіршілігінің куәгері, солардан қалған өшпес мирас, өлмес мұрасы. «Ел іші – өнер кеніші» демекші, ерекше қасиет дарыған Арал өңірінен де халық арасынан асылдың сынығы, тектінің тұяғы саналған зерделі шеберлер көп шыққан. Бүгінгі күні де қолөнерді жанына серік етіп жүрген жандар аз емес. Олар ата-бабаларымыздан қалған төл өнерімізді жалғастырушы, жаңғыртушылар десек артық емес»,- дей келе ұлтымыздың төл өнері саналған қолөнердің өрісін кеңейту жолында тер төгіп келе жатқан зергер, шебер-ұсталарға алғысын білдіріп, еңбектеріне сәттілік тіледі. Одан әрі қазылар алқасының шешімімен байқау қатысушыларына арнайы номинациялар мен аудан әкімінің алғыс хаты, ынталандыру сыйлықтары табысталды.
Атап өтейік, байқау қорытындысы бойынша «Үздік ағаш шебері» номинациясымен №263 мектебінің ұстазы Мақсат Өмірзақов, «Үздік зергер» номинациясымен Мырзабек Қаныбаев, «Үздік сүйек бұйымы» номинациясымен Құрманғазы Бектұрсынов, «Үздік ұлттық бұйымдар» номинациясымен Сағынкүл Дәрібаева марапатталса, ал Жаңагүл Аймағамбетова «Үздік тігін шебері», Кемалова Жансия «Үздік тоқыма шебері» номинацияларына ие болды. Қалған байқау қатысушыларына аудан әкімінің алғысы табыс етілді.
Атап өту қажет, бүгінгі өткізілген көрменің басты мақсаты – ұлттық қолөнерді дамыту, қолөнер шеберлеріне қолдау көрсету, олардың жасаған бұйымдарын халық арасында кеңінен насихаттау, жас әрі дарынды қолөнершілерді анықтау. Одан қалды бабадан қалған қолөнерді ұрпақ санасына сіңіріп, кәсіп ретінде дамыту.
