Мәскеуде Әлихан Бөкейханов туралы кітаптың тұсауы кесілді
Мәскеудегі Қазақстан елшілігінде «Алаш» партиясы көшбасшыларының бірі, қазақтың көрнекті қоғам және мемлекет қайраткерінің өмірі мен қызметі туралы жазылған «Алихан Букейханов. Человек-эпоха» (Әлихан Бөкейханов. Аңыз адам) кітабының тұсаукесері өтті, деп хабарлайды Egemen.kz.Кітап авторы - ресейлік ғалым, тарих ғылымдарының докторы, профессор Виктор Козодой.
Автор өз еңбегінде дереккөздерді, материалдар мен фактілерді, соның ішінде бұрын ғылыми айналымда пайдаланылмаған мұрағат құжаттарын, естеліктерді, сол жылдардағы газет-журнал беттеріндегі жарияланымдарды пайдаланған.
Бұған дейін кітаптың тұсаукесері Қазақстанның бес қаласында (Астана, Алматы, Павлодар, Семей, Қарағанды) сәтті өткен болатын. Енді ресейлік ғалымдар мен сарапшылардың қатысуымен Мәскеу қаласында өтті.
Жиынды ашқан Қазақстанның Ресейдегі елшісі Ермек Көшербаев бұл кітап Қазақстанның тәуелсіздігін болжаған тарихи оқиғаларды зерттеуге елеулі үлес қосты деп есептейді.
Шара барысында Ермек Көшербаев Виктор Козодойға 2-дәрежелі «Достық» орденін және Қазақстан Республикасы Президентінің Алғыс хатын табыс етті.
Өз кезегінде ғалым Қазақстан басшылығына жоғары марапаты үшін алғыс айтып, кітапты екі ел халықтары арасындағы достықты нығайтуға қосқан үлесі екенін жеткізді. Оның пікірінше, Әлихан Бөкейхановты Қазақстанның ғана емес, Ресейдің де тарихи қайраткері деп санауға болады, өйткені ол Мемлекеттік Думаға сайланды, Бүкілресейлік ұйымдардың жұмысына және Бүкілресейлік мәселелерді шешуге қатысты.
Сөз соңында Виктор Козодой кітаптың қазақ тіліне аударылғанын айтып, жақын арада жарық көретінін хабарлады.
