Ливиядағы су тасқыны
Африканың тағы бір елі Ливия су тасқынынан зардап шекті. Дерна қаласында күшті дауылдан кейін су қоймасы жарылып, таяу маңдағы елді мекендерді шайып кетті. Қызыл Крест және жергілікті шенеуніктер жойқын су тасқынынан кейін кемінде 10 мың адамның із-түзсіз жоғалғанын хабарлады.Ливияның шығысын бақылайтын әкімшіліктің өкілі Мохаммед Әбу-Ламуша мемлекеттік ақпарат агенттігіне берген сұхбатында қаза тапқандардың саны 5 300-ден асқанын хабарлады. Шығыс үкіметінің тағы бір өкілі Тарик әл-Харраз бүкіл аудандарды су шайып, көптеген мүрденің теңізге ағып кеткеніне тоқталды.
Қазіргі таңда зираттарда мәйіттер жүздеп саналады. Тірі қалғандар оларды әрең-әрең танып жатыр. Әл-Харраздың айтуынша, қаза тапқандар саны он мыңнан асып кетуі ықтимал. Халықаралық Қызыл Крест және Қызыл Жарты Ай ұйымдары да осындай болжам жасап отыр.
Дүниежүзілік денсаулық сақтау ұйымының Ливиядағы өкілдігінің қызметкері Рами Эльшахеиби Дернадағы жағдай жаншошырлық екенін атап өтті. Азаматтық авиация министрі Хичем Чкиуат қайтыс болғандардың көбі су басқан жерде қалғанын мәлімдеді.
«Мәйіттер шашылып жатыр. Теңізде, жағалауларда, ғимараттардың астында өлгендер жүздеп саналады. Қаланың 25 пайызы жоғалып кетті десем, артық айтқаным емес. Көптеген ғимарат қирады», дейді Х.Чкиуат.
Ливия талай жылдан бері азаматтық соғыстан көз аша алмай келеді. Сол себепті елдегі инфрақұрылымдар әбден тозған. Бұқаралық ақпарат құралдарында тараған ақпаратқа сүйенсек, инженерлер бұған дейін бөгеттердің жарылу қаупі бар екенін, шұғыл түрде жөндеу жұмыстарын жүргізуді ескерткен. Ливияда орналасқан «Sadeq» сараптамалық орталығының негізін қалаушы Анас әл-Гомати мәселені жан-жақты зерттеу керектігіне екпін береді.
«Солтүстік Африка климаттың өзгеруінен зардап шегеді. Бірақ бұл жолы сыбайлас жемқорлық пен біліксіздік апатқа душар етті. Дернада эвакуация болған жоқ. Қазір қала тұрғындарының төрттен бірі су астында қалды», дейді әл-Гомати.
egemen.kz
