Гаитиде су тасқынынан 42 адам қаза тапты

Өткен демалыс күндері Гаитиде нөсер жауын салдарынан мыңдаған үй су астында қалды, 42 адам қаза тауып, тағы 85-і жарақат алды, деп хабарлайды ҚазАқпарат CNN-ге сілтеме жасап.

Біріккен Ұлттар Ұйымының ақпаратынша, қатты жаңбырдан соң Гаитиде бірнеше өзен арнасынан шығып, бұл өз кезегінде су тасқынына, тас және лай көшкініне әкеліп соққан.

Су тасқыны салдарынан 13 300-ден астам адам үйін тастап кетуге мәжбүр болды.

Гаитидегі 10 департаменттің бесеуінде: Батыс, Ниппес, Оңтүстік-Шығыс, Солтүстік-батыс және Орталықта тағы 11 адам із-түзсіз жоғалды.

«Үкімет ұлттық және халықаралық институттармен бірлесіп, жағдайды шешу үшін шұғыл шаралар қабылдап жатыр», - деп жазды Гаити премьер-министрі Ариэль Анри Twitter парақшасында.

Дүйсенбіде жауған жауын-шашынның салдарынан қаза тапқандар саны тағы өсті.

Су тасқынынан зардап шеккендерге көмек көрсетуге шұғыл әрекет ету топтары мен көмек көрсету ұйымдары жұмылдырылды.

Гаити гуманитарлық көмекке мұқтаж.

Су тасқыны қаупі 1 маусымда басталған дауыл маусымында жалғасады деп болжанып отыр.