Израильдің Газадағы тұрғын үйге жасаған соққысынан 12 бала қаза тапты

Израильдің Газа секторының оңтүстігіндегі Рафах қаласындағы тұрғын үйге жасаған соққысы нәтижесінде 12 бала мен 4 әйел қаза тапты. Бұл туралы CNN дәрігерлердің мәліметіне сілтеме жасап хабарлады.

Оның айтуынша, барлығы 21 адам қаза тауып, ондаған адам жараланған.

Бұған дейін Al Jazeera Израильдің шабуылы салдарынан Рафах қаласында кем дегенде 20 адамның қаза тапқанын хабарлаған.

7 қазаннан бері Израиль шабуылы салдарынан 20 400-ден астам палестиналық мерт болды. 7 қазандағы ХАМАС соққысынан 1139 Израиль азаматы қаза тапты.

БҰҰ хабарлауынша, Газа секторында екі миллионға жуық адам азық-түлік пен су жетіспеуінен зардап шегіп отыр. Бағалау бойынша, су қорының 96%-і адам тұтынуға жарамсыз. Алғашқы қажеттілік заттары, оның ішінде ауыз су мен дәрі-дәрмек жетіспей жатыр.

Бұған дейін Израиль билігі Газа секторының оңтүстігіндегі халықты дереу көшіруге бұйырғаны хабарланған болатын.

Сондай-ақ Израильдің Газа секторына соққылары салдарынан 7 қазаннан бері 20 258 адам мерт болды, тағы 53 688-і жарақат алғанын жазған едік.

Сурет: kaz.inform.kz