Кореяда өткен қазақ құрылтайы
Оңтүстік Кореяда Азия елдеріндегі қазақтардың екінші құрылтайы өтті. Бұл жолы Йонин қаласында Малайзия, Жапония және Моңғолиядағы қазақ диаспораларының өкілдері бас қосты. Жиынға қатысушылар мәдени және экономикалық ынтымақтастық жөнінде пікір алмасты.Іс-шара Сеулдегі «Qazaq Nomad Korea» ұйымының бастамасымен, Қазақстанның Корея Республикасындағы Елшілігі және «Отандастар қоры» КеАҚ-ның қолдауымен 5-6 сәуір күндері ұйымдастырылды. Сондай-ақ демеушілер қатарында Hankuk шет тілдері университеті (HUFS), «Air Astana» әуе компаниясы, «Pana» қонақүйлер желісі мен «ELSYM8» компаниясы бар.
Құрылтайдың алғашқы күні мәдениет саласы өкілдерінің қатысуымен мәдени блок және Қазақстан және Корея кәсіпкерінің қатысуымен экономикалық блоктен тұратын екі пленарлы отырыс өтті. Онда Азия елдеріндегі қазақ мәдени орталықтарының қазіргі жағдайы мен болашақ жоспарлары, мәдени-рухани байланыстарды нығайту, сондай-ақ шетелдегі отандастармен білім, ғылым және кәсіпкерлік салаларында серіктестік орнату секілді маңызды мәселелер талқыланды.
Жиынға «Отандастар» қоры қазақ тіліндегі кітаптарды алып барды. Суретші әрі зергер Ақмарал Бақытова өз жұмыстарын көрсетті. Қазақстанның еңбек сіңірген қайраткері Светлана Айтбаева қатысушыларды қазақ өнерімен таныстырды. Ал этнограф Айгерім Мұсағажинова қазақтың ұлттық тағамдарының пайдалы қасиеттері туралы айтып берді. Қазақстанның еңбек сіңірген қайраткері Жұбаныш Жексенұлы көрермендермен бірге танымал қазақ әндерін шырқады. Құрылтайдың Хангук шетел тілдері университетінде өтуі кездейсоқ емес.
– Азияның әр түкпірінен келген делегаттардың Кореядағы басқосуы шетелдегі қазақы құндылықтардың жаңғырып, жырақта жүрсе де, туған елмен байланысын үзбейтін отандастарымызбен арадағы ынтымақтастықты нығайтатын маңызды қадам екені сөзсіз. Биыл Бурабайда өткен Ұлттық құрылтайдың IV отырысында Мемлекет басшысы Қасым-Жомарт Тоқаев Абай институты негізгі серіктес елдердің бәрінде төл мәдениетімізді насихаттайтын орталық болуға тиіс деген еді. Осы тапсырма негізінде аталған жоғары оқу орнында Абай институтын ашуды көздеп отырмыз. Әзірге келіссөздер жүргізіліп жатыр. Бұл орталық осы біздің диаспоралар мен басқа да шетелдіктерге қазақ тілін үйрету құралы ретінде жұмыс істейтін болады, – деді «Отандастар қоры» КеАҚ президенті Данияр Қадыров.
Фестиваль аясында Оңтүстік Кореяда алғаш рет қазақ тілінде шешендік өнер сайысы өтті. Оны Қазақстанның Сеулдегі елшілігі ұйымдастырды. Финалға Хангук университетінің жеті студенті шықты. Олардың қабілетін Мәдениет қайраткері, әнші Қанат Айтбаев бастаған қазылар алқасы бағалады. Бірінші орын екінші курс студенті Ли Со Ёнға бұйырды.
– Мәдениет жай ғана ғимараттар, мекемелер емес. Бұл тұтас ұлттық сана-сезімін жаһандық деңгейде нығайта түсетін мықты тұғыр. Сондықтан мәдени байланысымыз берік болуы үшін қазақ тілін үйреніп, екі ел арасындағы қарым-қатынасты одан әрі арттыруға ықпалдасқым келеді, – деді студент.
Қазақ тілі байқауының жеңімпазы Сеул-Алматы-Сеул бағытындағы тегін әуе билетін иеленді. Ұйымдастырушылар бұл сыйлық Ли Со Ёнға Қазақстанға барып, тілін одан әрі жетілдіруге мүмкіндік береді деген ойда.
– Хангук университетінде Орталық Азия елдерінің тану факультеті бар екен. Сол жерде қазақ-өзбек тілін үйренетін жастардың біздің мәдениетімізді, тілімізді еркін меңгеріп үйреніп жатқанын көріп көңіліміз біраз көтеріліп қалды. Келбеттерінен емес, тіліне қарап қана корей не қазақ жастары екенін айырып тұрмыз, – деді әнші Қанат Айтбаев.
Ал екінші күні қазақ орталықтарының өкілдері мен отандастарымыздың қатысуымен Наурыз мерекесін атап өту, ұлттық ойындар фестивалі және өнер жұлдыздарының қатысуымен мерекелік концерт ұйымдастырылды.
Ақпарат көзі: egemen.kz
Фото: egemen.kz
