Иран зымыраны Израильдегі ауруханаға соққы берді

Израиль мен Иран арасындағы қақтығыстың жетінші күнінде Иран зымыраны Беэр-Шева қаласындағы Сорока медициналық орталығын зақымдады. Израиль билігінің мәліметінше, шабуыл кезінде кемінде 89 адам жараланған, деп хабарлайды BAQ.KZ тілшісі BBC-ге сілтеме жасап.

Иран тарапы соққы әскери нысанға бағытталғанын, ал аурухана кездейсоқ зардап шеккенін мәлімдеді. Алайда Израиль үкіметі бұл әрекетті қасақана жасалған және халықаралық құқыққа қайшы деп бағалап отыр.

Израиль премьер-министрі Биньямин Нетаньяху X желісінде жариялаған мәлімдемесінде:

Тегерандағы тирания үшін толық жауап алынады, – деп жазды.

Осыған жауап ретінде Израиль әскері Ирандағы ядролық нысандарға соққы жасады. Арасында Арак ауыр су реакторы мен Натанз кешені де бар. Әскери мәліметке сүйенсек, бұл нысандар ядролық қару жасауға арналған компоненттерді қамтыған.

Қақтығыс 13 маусымда басталды. Израильдің ядролық нысандарға алғашқы соққысы кезінде Иранның бірнеше жоғары лауазымды генералы мен ядролық ғалымдары қаза тапқан болатын.

Сорока ауруханасында шыққан өрт нәтижесінде бірнеше бөлім толық жойылып, шамамен 200 науқас басқа медициналық мекемелерге көшірілді. Израиль қорғаныс министрі Иранның Жоғарғы көшбасшысы Али Хаменеи туралы:

Ауруханаларға соққы беруге тікелей бұйрық беретін адам әлемде болмауы тиіс, – деп мәлімдеді.

Соңғы деректерге сәйкес, Иран ядролық объектілерге жасалған шабуылдарға байланысты БҰҰ ядролық агенттігіне шағым түсіріп, Израильді халықаралық нормаларды бұзды деп айыптады.

Сонымен қатар, АҚШ-тың бұл қақтығысқа тікелей араласу мүмкіндігі халықаралық қоғамдастықтың алаңдаушылығын тудырып отыр. АҚШ-тың бұрынғы президенті Дональд Трамп Иранға соққы жасау жоспарын мақұлдағанымен, соңғы шешімді кейінге қалдырған.

Фото: baq.kz