Американың Cooper University Health Care университетінің ғалымдар тобы науқастардың өзіне мейірімділік танытатын дәрігерлердің қарамағында тез жазылатынын дәлелдейтін материалдарды ұсынды

Ғалымдардың пікірінше, медицина қызметкерлерінің мінез-құлқы науқастың емді қалай ұстанатынына тікелей әсер етеді. Дәрігерлер науқасқа қамқорлық көрсеткенде және олар оны сезінсе, емделушілер емге үлкен жауапкершілікпен қарайды.  Осыған қатысты зерттеуші Энтони Маццарелли тағы бір мысал келтірді. Оның айтуынша, дәрігерлердің немесе медбикелердің ота алдында науқастарға қолдау көрсетуі оларды тыныштандыруға мүмкіндік береді.  Яғни, тыныштандыратын әсерге қол жеткізеді. Сонымен қатар, отадан кейін ауырсынуды басатын дәрілерге деген қажеттілік төмендейді.
Зерттеушілер сондай-ақ, емдеуші дәрігерлердің мейірімділігі мен аяушылық сезімі емделушіге ғана емес, сонымен бірге медицина қызметкерлеріне де пайдасын әкеледі дейді. Себебі, науқас жылдам жазылғандықтан, дәрігерлер жұмыс мәселелеріне алаңдамай, шаршамай жүреді. 
Осыған орай, Маццарелли науқас өзін жайлы сезіну үшін дәрігер ұстануы тиіс бірнеше ереже ұсынды:

• медицина қызметкері науқаспен сөйлескен кезде тұрып тұрмай, отырып сөйлесуі тиіс;
• дәрігер науқастың көзіне қарап сөйлеуі керек;
•  ол емделушінің тек физикалық емес, сонымен қатар эмоционалдық және психикалық денсаулығына да назар аударуы керек.