Барлық қолдауларға разымыз

Еліміздің ұлттық арнасынан жаңалықтар көріп болғанымыз сол еді мемлекет басшысы елімізді дүрбелеңге салған коронавирус індетіне байланысты Қазақстан халқына мәлімдеме жасады. Қуанып қалдық. Жалпы жаппай халықты әбігерге салған мұндай кезеңде мемлекеттің халыққа көмек жасауы қуанарлық жағдай ғой. Себебі аты жаман індетті жан-жағымыздан жиі естіген сайын үрейленіп барамыз. Шыны керек тіптен үйден шығудың өзі қорқынышты болып қалды. Осындайда кәсіпкерлерге қолдау көрсеткен ел билігіне риза болдық. Ел экономикасының тірегіне саналған кәсіпкерлерге көрсетілетін қолдаулардың арқасында ұзақжылдық жоспарлар мен қаржылық дағдарыстардың алдын алу мүмкін болып отыр. Бұлардың санатында егіншілікпен айналысатын қожалықтар мен біз секілді қарапайым шаруалар да бар. Өз сөзінде мемлекет басшысы Қасым-Жомарт Тоқаев:«Кәсіпкерлерге көмек көрсетуіміз керек. Өйткені, олар – экономикамыздың тірегі. Әкімдіктер жергілікті кәсіпорындардың өнімін кем дегенде 6 ай бойы кепілді сатып алу тәртібін жолға қоюы керек. Шағын және орта бизнес өкілдерін биылғы 1 қазанға дейін еңбекақы төлеу қорынан ұсталатын салықтан босатудытапсырамын. Мұндай қолдау сауда, көлік қызметі, қонақүй, туризм және басқа да салаларды қамтиды. Ауыл шаруашылығымен айналысатын кәсіпкерлерге де қолдау көрсетіледі. Атап айтқанда, бюджеттен 70 миллиардтеңге бөлінеді. Көктемгі егіс науқаны үшін «Қарапайым заттар экономикасы» бағдарламасы арқылы қосымша 100 миллиард теңге бөлуді тапсырамын. Ең алдымен, шағын және орта шаруа қожалықтарына қолдау көрсеткен жөн», –деді.
Біз мұндай мүмкіндіктердің жасалып жатқанына қатты қуаныштымыз. Осындай жағдайда елдің жағдайына қарайласып «Біз, мемлекет және қоғам болып барша азаматтарымызға қолдау көрсетеміз, ешкімді көмексіз қалдырмаймы» деген Қазақстан президентіне сенеміз. Бірлікте болып, сақтық шараларын қатаң ұстанайық жерлестер!
Жанәбіл Әбдешов,
Ақбай елді мекенінің тұрғыны, зейнеткер.