Ерікті жастар елге қамқор

Жыл басында Мемлекет басшысы Қасым-Жомарт Тоқаев 2020 жылды «Волонтерлер жылы» деп жариялаған болатын. Бұл ел мүддесін ойлап, халыққа шынайы жанашыр болып жүрген жандардың мерейін өсіре түсті. Еріктілердің екпінімен елімізде атқарылып жатқан жұмыстар ауқымды. Олар – қандай қиын шақта болмасын, көмекке әзір тұратын жомарт жүректі адамдар. Биылғы жылы олар үшін жауапкершілік жүктеген жыл болды.Бүгінде әлемді шарпыған аты жаман ауру біздің елімізге, тіпті ауданымызға да жетті. Барлық қоғамдық орындар жабылып, көптеген жұмыс орындары тоқтады. Бірқатар құрылымдар қашықтан жұмыс істеуге көшті. Төтенше жағдай жариялануына байланысты тұрғындардың еркін жүріп-тұруы да уақытша шектелді. Осы сәтте аудандағы ерікті жастар жұмылып, жұдырық болып халыққа қолдау көрсетуге кірісті. Аудандық жастар ресурстық орталығы мен Сексеуіл кенті еріктілерінің ұйымдастыруымен #BIRGEMIZ #Saylyq жобасы аясында коронавирустың таралуына жол бермеу және алдын алу мақсатында тұрғындарға жадынамалар мен медициналық бетперделерді тегін таратты.

– Аудандық жұмыспен қамту, әлеуметтік бағдарламалар және азаматтық хал актілерін тіркеу бөлімі мамандары мен ерікті жастар бірлесе отырып, қаламыздағы жүріп-тұруы қиын, жалғызбасты, төсек тартып жатқан мүмкіндігі шектеулі жандарға мемлекет тарапынан берілетін міндетті гигиеналық құралдарды үйіне апарып табыстау жұмыстарын жүргізді. Сонымен қатар аудандағы ерікті жастар орталық базар маңы мен халық көп жүретін аймақтарды аралап, тұрғындарға 500 бетпердені тарту еттік, – дейді «Жас толқын» еріктілер ұйымының жетекшісі Ержан Сабырбай.

Иә, бүгінгі ахуал күн санап қиындап барады. Қызылорда облысы ауру қармағына іліккен науқастар саны жөнінен алдыңғы қатардағы үштікке кіріп отыр. Мұндай ауыр кеселден аман қалу үшін қажет болған жағдайда қорғанып шығып, болмаса үйде болған жөн. Осыған үндеген жастар арнайы бейнеролик әзірлеп, эстафета арқылы достарын да үйде болуға шақырды. Оған қоса, «Жас толқын» еріктілер ұйымы #дәрігерлергемыңалғыс челленджін бастап, бұл Ақбай ауылы еріктілерінен қолдау тауып, кейіннен аудан жастары аталған акцияға үн қосып, еліміздегі барша ақ халатты абзал жандарға алғыстарын білдірді.

Сондай-ақ жалғызбасты, аз қамтылған, көпбалалы отбасыларды қажетті азық-түлікпен қамтамасыз ету жұмыстары да тұрақты түрде жүргізіліп келеді.

– Біз ерікті жас болғандықтан, мұқтаж жандарға өзіміздің жүрек қалауымызбен қолдау көрсетіп келеміз. Бүгінгідей қысылтаяң шақта еліміздің жастары халыққа жанашыр бола білсе, еліміздің ертеңі жарқын болмақ. Біз мұқтаж жандарды қажетті заттармен қамтып қана қоймай, ауласын, үй ішін тазалап та көмек көрсетіп жүрміз. Аралдық жастар осы шақта халыққа барлық жағынан қолау көрсетуге тырысуда, – дейді жастар жетекшісі Ержан.

Бүгін біз ғана емес, бүкіл әлем ауыртпашылықты өткеруде. Мұндайда ауызбіршілік танытып, ұлт болып ұйысқанда ғана өзімізді аман сақтап, болашаққа бірге барамыз. Ендеше, еліміздің болашағы жолында тер төгіп жүрген еріктілердің еңбегі мақтауға лайық.

Н.Бақыран.