Тапсырыс беруші газдандыру қызметі ақысын төлемеген

Арал аудандық сотында талап қоюшы «Қ» АҚ-ның жауапкер И-ден келісім-шарт бойынша қалыптасқан дебиторлық қарыз сомасын өндіру туралы азаматтық ісі қаралды.Іс құжаттарына сәйкес, азамат И. «Қ» АҚ-на газ тарату жүйесіне қосу қызметін көрсетуге тапсырыс берген, осыған орай мамандармен келісім-шартта көрсетілген мерзім ішінде газдандыру жұмыстары жүргізілген.
Келісім-шарт бойынша жауапкер көрсетілген қызметтер үшін 72 128 теңге төлеуге міндеттенген, алайда бүгінгі күнге дейін өз міндетін орындамаған.
Қазақстан Республикасының АК-нің 272 бабына сәйкес, мiндеттеме - мiндеттеме шарттары мен заң талаптарына сәйкес тиiсiнше орындалуға тиiс, ал мұндай шарттар мен талаптар болмаған жағдайда - iскерлiк қызмет өрiсiндегi әдеттегi құқықтарға немесе әдетте қойылатын өзге де талаптарға сәйкес орындалуға тиiс.
Сот шешімімен тапсырыс берушіден 72 128 теңге берешек қарызы өндірілді.

Арал аудандық сотының
баспасөз қызметі