Жолдау жаңа істерге серпін береді

Осыдан бір аптадай бұрын «1 қыркүйекте Қазақстан Президенті Қасым-Жомарт Тоқаев қазақстандықтарға кезекті Жолдау жасайды екен. Онда әлеуметтік салаға басымдық беріледі екен» деген жақсы хабарды құлағымыз шалған еді. Қуанып қалдық. Қазір халықтың күтіп жүргені де осы әлеуметтің экономикалық жағдайы еді. Десе де пандемия салдарынан еліміздегі жағдайдың қиындай түскені рас. Кейбір жандар өмірлік қиын жағдайда қалды. Бұл енді әлеуметтік жүйенің әр саласына қатысты. Соның ішінде дәрігерлерге жасалатын демеудің қарқынды екені көңіл қуантты. Ал бір кездегі болған дәрі-дәрмек тапшылығы алдағы уақытта сезілмейді деген үміттеміз. Себебі Мемлекет басшысы отандық өндірістегі фармацевтикалық өнімнің қорын молайту керектігін айтты. Яғни Қазақстан Президенті Парламент палаталарының бірлескен отырысындағы Қазақстан халқына Жолдауында:

«2023 жылға қарай дәрігерлердің еңбекақысы экономикадағы орташа жалақыдан екі есе артық болады. Сондай-ақ отандық фармацевтика саласын аяғынан тік тұрғызу керек. Барлық дәрі-дәрмек пен медициналық бұйымдар Қазақстанда өндірілуі тиіс. Бұл – ұлттық қауіпсіздік мәселесі», – деген болатын.
Көп елдердің пайымынша, әлемді жайлаған індеттің өршу кезеңі болады-мыс. Қазір онымен күрестің қарқынды тетіктері де қарастырылып жатқаны белгілі. Еліміз де бастан өткен жағдайдан сабақ алып, індеттің алдағы толқынына толыққанды дайын болуымыз керек. Мемлекет басшысының елдегі денсаулық сақтау саласына оң көзқарас танытып отырғаны да сондықтан деген ойдамын.
М.Жолдасбаев,
«Ғабит–64» дәріханасының фармацевті