Толқын Арал аудандық қоғамдық-саяси газет
» » Аңсаған арманның жемісі

Аңсаған арманның жемісі

Тәуелсіздік – тәуелсіздігімен, егемендігімен, тәуелсіз елі мен жері, тілі мен дінімен маңызды! Еліміз қалай болғанда да сан ғасырлық қиын- қыстау жолдан, тар жол тайғақ кешуден өтті. Сондықтан Тәуелсіздік – ең алдымен, Қазақ халқының бостандыққа ұмтылған асқақ армандары мен қайсар рухының жемісі. Өз басым мемлекетіміздің тәуелсіздігін халқымыздың бақыты деп санаймын.
Ата-бабаларымыз найзаның ұшымен, ақ білектің күшімен қорғап қалған қасиетті жерімізді ардақтап, қорғау – әрбіріміздің парызымыз. Бұл орайда, тәуелсіз елдің кез келген азаматы азаттықты бағалап жүр деп ойлаймын. Өз басым ұлы дала елінің кең-байтақ жерінде туып, топырағында аунап өскеніме өте қуанамын. Қазіргі кезде өзге елдердің хал-ахуалына қарап, бейбіт елде ынтымағымыз бен бірлігіміз жарасып, өмір сүріп жатқанымызға шүкіршілік етемін. 29 жыл тарих сахнасы үшін аз ғана уақыт болуы мүмкін, ал біз осы жылдар ішінде көпұлтты мемлекет бола тұра, ауыз толтырып айтарлықтай жетістіктерге жеттік. Бұл – салиқалы саясаттың, дұрыс бағыт-бағдардың нәтижесінде келген еңбектің жемісі.
Азат еліміздің ең ұлық, ең қастерлі мерекесі – Тәуелсіздік күні. Тәуелсіздік мерекесі – мерекелердің төресі! Қазіргі жағдайымыз, бейбіт елде өмір сүріп жатқанымыз бәрі осы тәуелсіздігіміздің арқасы.
Нұрбек Қуанышбайұлы,
Ұ.Қараманов атындағы №262 мектеп-гимназия директорының тәрбие ісі жөніндегі орынбасары
16 желтоқсан 2020 ж. 278 0