Барсакелмес қорығы –аудан мақтанышы

Қазақ елі – табиғаты көркем аймақтарға толы мекен. Алтайдан Атырауға, Алатаудан Арқаға дейінгі аралықта созылып жатқан кең байтақ жеріміздің асты да, үсті де бай. Солардың бірі өңірімізде орналасқан табиғатты қорғау орындарының ішіндегі ең ерекшесі – Барсакелмес мемлекеттік қорығы. Бұл еліміз бойынша сирек кездесетін жануарлар мен өсімдіктер дүниесі шоғырланған, көлемі жөнінен ең үлкен қорықтардың бірі болып саналады. Соған сәйкес облыстық мәслихат депутаттығына үміткерлер Талғат Шүренов пен Лаура Ибраимова, аудандық мәслихат депутаттығына үміткер Әлібек Шораев пен Ислам Қапаров үгіт насихат жұмыстарын жүргізу мақсатында «Барсакелмес» табиғи қорығының қызметкерлерімен кездесу өткізді.
– Әлемді шарпыған коронавирус пандемиясы жаңа қиындықтар туғызуда. Бірақ біз барлық сынақты бірге еңсеріп, жеңіске жететінімізге сеніміміз мол. Жыл бойы жүргізілген «партияны қайта жандандыру» жұмыстары «Nur Otan» партиясы мүшелерін жұмылдырып, азаматтардың мүддесі үшін атқарылып жатқан жұмысты күшейтуге мүмкіндік берді. Жақында ел мақтанышына айналған қорығымызда тынымсыз еңбегінің арқасында «Ең үздік қорық» номинациясымен марапатталды. Бұл марапат қорық қызметкерлерінің табанды еңбегінің жемісі екендігін көрсетеді, – деді Т.Шүренов.

Үміткерлер өз кезегінде партияның сайлауалды бағдарламасын, негізгі бағыттарын егжей-тегжейлі баяндап, «Барсакелмес» табиғи қорығының қызметкерлерін толғандырған түйінді мәселелердің шешімін тауып, алдағы 10 қаңтарда өтетін сайлауға дауыс беруге шақырды.