Еңбегімен елге танылған

Әйел өмір жасаушы. Отбасының мызғымас татулығын сақтап, ұрпағына саналы тәрбие беріп, қоғамның дауына үлес қосып жүрген нәзік жандыларға қандай құрмет көрсетсек те көптік етпейді. Қай заманда болмасын әйелдер өздерінің табанды еңбегімен танылып, құрмет төріне көтеріліп отырды. Елеулі еңбегімен танылған сондай жандардың бірі – анамыз Лиза Жанназарқызы.

Қазақта «ұяда не көрсең ұшқанда соны ілесің» деген жақсы сөз бар. Біз үшін ата-анамыз сыйлы азамат болудың озық үлгісін көрсетті. Әкем Қуаныш Жанғазыұы мен анам Лиза Жанназарқызы ұзақ жылдар Арал ауданының медицина саласының дамуына үлес қосты. Оларды табыстырған да қызмет жолы. 1949 жылы Арал қаласында, қарапайым отбасында дүниеге келген анамыз еңбек жолын Арал аудандық емханасында бастады. Еңбек еткен жылдарында анам өзінің адал қызмет еткендігінің арқасында құрмет төріне көтерілді. Құрмет грамоталар, алғыс хаттармен марапатталды. Осы салаға саналы ғұмырын арнаған анам құрметті зейнет демалысына шықты. Немерелірінің сүйікті әжесі болып бақытқа кенелген шақта тағдырының дәм тұзы түгесілген-ді.

Анамыз қазақ әйеліне тән асыл қасиетті бойға жиған жан. Прасаттылық, байсалдылық, мейірім мен тәрбиелі әңгімесі ұрпақтарының қоғамнан өз орынын тауып, тұлға болып қалыптасуына септігін тигізді. «Алып анадан туады» деп дана халқымыз бекер айтпаса керек-ті. Анадан алған асыл қасиеттің арқасында біз де ел дамуына үлес қосып, адал қызмет атқарып келеміз. Отбасында ананың орыны ерекше. Содан да болар «Анасы бар адамдар ешқашан қартаймайды» деген әдемі сөздің пайда болғандығы. Ақ жаулығын тағынып, ақылшы болған анамыз тура 70 жасқа толған шағында арамыздан алыстап кетті. Бізге өмір сыйлаумен қатар сол өмірді мәнді де мағыналы ету жолында көкірек көзімізді ашып, тәлім тәрбиені бойға сіңіре білген анаға деген құрметіміз қашанда ерекше.

Айнұр Айдарбекқызы.