27 желтоқсан күнгі ауа райы болжамы

27 желтоқсан күні республиканың батыс және оңтүстік-шығыс бөліктерінде жауын-шашын жауады (көбінесі қар түрінде). Ал еліміздің солтүстік, шығыс және орталығында ауа райы көбінесе жауын-шашынсыз болады. Республиканың батысында және оңтүстігінде көктайғақ күтіледі. Кей жерлерде тұман, жаяу бұрқасын және желдің күшеюі болжанады, деп хабарлайды ҚазАқпарат.

«Қазгидромет» РМК болжамына сәйкес, Батыс Қазақстан, Қостанай, Жамбыл облыстарында тұман, көктайғақ, жаяу бұрқасын күтіледі. Желдің екпіні 15-20 м/с күшейеді.

Атырау, Түркістан облыстарының кей жерлерінде тұман, көктайғақ болжанады. Күндіз Атырау облысында жел 15-20 м/с күшейеді.

Алматы, Ақтөбе, Солтүстік Қазақстан, Павлодар, Қарағанды, Шығыс Қазақстан облыстарында кей жерлерде тұман күтіледі, күндіз Ақтөбе облысында жел 15-20 м/с артады.

Сондай-ақ Алматы, Қарағанды, Шығыс Қазақстан облыстарында түнде кей жерлерде қатты аяз болады.