Оқу орнын бітіргенше алимент өндіру жөніндегі іс, медиативтік келісім жасасумен аяқталды

Арал аудандық сотында талап қоюшылар Е.К. және Е-нің жауапкер М-дан оқу орнын бітіргенше алимент өндіру жайлы азаматтық ісі қаралды.Іс құжаттарына сәйкес, талап қоюшы К. жауапкер М-мен арасындағы некені 2003 жылы бұзған, некеден туылған балалары, яғни талапкер Е. Алматы қаласындағы Қазақ мемлекеттік қыздар педагогикалық университетінің 2-курсында ақылы бөлімде, ал екінші баласы Е. Алматы қаласындағы Д.Қонаев атындағы колледжінің күндізгі бөлімде ақылы түрде оқиды. Талап қоюшылар анасымен бірге тұрады. Жауапкер М-нің тарапынан балаларының оқу ақысын төлеуге материалдық көмек көрсетілмейді.
Сот отырысында тараптар медиациялық келісімге келген. Келісімнің шарттары бойынша, талап қоюшылар қойып отырған талаптарынан бас тартады, ал жауапкер болса талап қоюшыларға оқу орнын бітіргенше ай сайын 20 000 теңгеден төлеп тұруға міндеттенеді.
Дауды медиация тәртібімен реттеу туралы келісім бекітілуіне байланысты, іс бойынша іс жүргізу өндірістен тоқтатылды.
Арал аудандық сотының
баспасөз қызметі