Шаруаларға көмек заңдылыққа сай көрсетіледі

Халқымыздың ата кәсібі – мал шаруашылғы екені бағзыдан белгілі. Жапан даланы тұяғының астына басқан төрт түліктің азығы жерде, күтімі елде. Расында малдың күтімі мен бейнеті бес батпан. Десе де ауданда орын алып жатқан жағдай сол шаруалардың тірлігін тұралатып тұр. Бүгінде ел-жұрт елең-алаң күйде. Бәрінің ойлағаны қорасындағы мен даласындағы малы. Алайда жағдайға байланысты аудан аумағындағы ауылдарға көмек көрсетіліп жатыр. Дегенмен ел болғасын түсініспеушілік, әртүрлі пікірлердің айтыла жүретіні жасырын емес. Малының амандығына алаңдаған халық арасында да түсініспеушілік ішінара орын алып жатыр. «Көмек толықтай берілмейді екен» деген алып-қашпа әңгіменің ауылы төбе көрсетуде.Бірақ бұл жерде мәселе кейбір шаруалардың өз ісіне мұқият қарамауынан да туындайтынын еске ала жүрген жөн. Мал баққанды дегенмен мал басын арттырудан басқа да иелеріне артылар міндет көп. Солардың бірі – мал басын түгелдеу тіркеуге қою болып табылады. Өкініштісі осы жауапкершілікті толықтай сезіне алмай жүргендер бар арамызда. Сол себепті де кімнің қанша бас малы барын анықтау барысындағы шараларды іске асыру кезінде зерделеу жұмыстарына қиындық туғызып немесе толық қанша көмек қажет екенін нақты біле алмауда. Халық арасындағы түсініспеушілік те осының салдарынан шыққан мәселе. Ал базаға тіркеуге қойылған әрбір мал басы ауданға жеткізілетін көмектің есебінен құр қалмайды. Себебі аудандағы атқарушы биліктің де басты мақсаты қиын сәтте аудан тұрғындарына жәрдем беру болып отыр.
Өзім де қазіргі таңда ет бағытында түйе және жылқы малын өсірумен айналысамын. Жылда малға қажетті жем-шөмті өзіміз алып, қыстың қамына ерте жаздан кірсетінбіз. Биылғы қарекет те осы. Дегенмен жағдайға байланысты қазіргі уақытта малға қажетті жеп-шөптің жағдайы аздап қиындық тудыруда. Осы мәселеге қатысты дерекке енгізілген мал басына мемлекеттен субсидия беріледі деген ақпараттар бар. Бүгінде соны аламыз деп талаптанып жатырмыз. Расында біз үшін мемлекеттен берілетін көмектің арқайсысы маңызды. Сол үшін қолда бар малды жергілікті құзырлы мекемелер арқылы есепке тіркеп, нақты санын көрсету маңызды. Мұндай жағдайда қай шаруа болмасын көмектен құр қалмайды деп ойлаймын.
Файзулла Хайрлаев,
«Несібе» шаруа қожалығының төрағасы