Ел ағаларының еңбегі ерек

Биыл аудан халқы үшін табиғи ахуал қолайсыз болды. Қыс пен көктемде жауын-шашын аз мөлшерде түсіп, жаздағы ыстық топырақтың құнарын жойып шөпсіз құрғақшылыққа душар етті. Оның үстіне Сырдың суы да биыл арнасынан бірнеше есе төмен түсті. Осының бәрі төрт түліктің түздегі азығының жоғалуына әкелді. Қуаңшылықтың салдарынан мал түзден қылтық шөп таппай, су ішуге барып тартылған көлдің батпақты табанынан шыға алмай жаппай қырыла бастады. Жаз басында шаруалар шырылдап, өздерінің халін тиісті орындарға жолдады. Әрине елдегі осы ахуал ешкімді бей-жай қалдырған жоқ. Аралдағы шаруалардың жағдайына алаңдаушылық білдірген сала басшылары тиісті шара қабылдап, мәселені оң шешуге атсалысты. Аудан аумағында төтенше жағдай жарияланып, шаруалардың шығындары өтелуде. "Көп түкірсе көл" демекші, көршілес аудандар да аралдықтардың қиындығын бірге көтеріп, жем-шөп жеткізуде. Әрине, қазір бәрі тамаша деп айта алмаймыз. Бірақ күрделенген мәселенің шешілу жолдары өз нәтижесін беруде.
Осы ретте қарапайым халық үніне құлақ түріп, мәселенің мәнін табуға тырысқан құзырлы орын басшыларына алғысымды айтқым келеді. Елім дейтін ер барда, ерім дейтін ел қашанда табылады. Жомарттық қалпынан айнымаған жұртымыз да жан-жақтан аралдықтардың ауыр жүгін көтерісуге атсалысуда. Осының бәрі біздің мызғымас бірлігіміз бен татулығымыздың жемісі деп білемін.
Р. ЕРЖАНОВ,
Арал қаласы