Бұл қиындықты да ел еңсеріп келеді

Ылғалдың азаюы себебінен биыл өңірімізде қуаңшылық болды. Қазіргі уақытта өзекті мәселелердің бірі де осы – қуаңшылық мәселесі болып отыр. Ауданда орын алған қуаңшылық жағдай ешбірімізді де бей-жай қалдырмады. Сонымен қатар табиғаттың тылсым күшінің бірі жауын-шашынның бәсеңдеуінен жерлеріміз құрғай бастап, мал шығыны орын алып жүрді. Соның салдарынан мал бағу қиынға соғып, шаруа қожалықтарына жайсыздық тудырды. Төтенше жағдай жарияланып, өңірімізге жем-шөп жеткізудің нәтижесінде қиындықты жеңіп келеміз.

Елімізде белең алған қуаңшылық жағдайға байланысты аудан әкімінің қолдауымен көптеген шаралар ұйымдастырылды. Сондай-ақ Жаңақорған, Шиелі, Байқоңыр, Қазалы, Жамбыл және де еліміздің көптеген аймағынан көмек көрсетілді. Жерлесіміз Болат Өтемұратовтың қорынан 213 млн. теңге қаржы бөлініп, 506 жанұя бидай жеммен қамтамасыз етілді. Сонымен бірге аудан кәсіпкерлері де көмек қолын созып, ауыл тұрғындары жем-шөппен қамтамасыз етілді. "Жұмыла көтерген жүк жеңіл" демекші, бұл қиындықты да ел еңсеріп келеді.

Қуаңшылық жағдайында Арал жеріне су тапшылығын жою бағытында да біршама жұмыстар жүргізілді. Қамбаш көлін суландыру үшін бөгет қойылып, сумен қамтамасыз ету мақсатында біршама жұмыстар жүргізілуде.

Қуаңшылықтан ауыл шаруашылығы зардап шегетіні белгілі. Сол үшін бұл нәрсені зерттеу – ең басты проблемалардың бірі. Осындай қиын-қыстау уақытта көмек көрсеткен кәсіпкер азаматтардан келешек жастарымыз да өнеге алары сөзсіз.

Айсауле НҰРЛАНОВА