Тазалық мәселесі басты назарда
Өткен аптада аудан әкімі Серік Сермағамбетовтың төрағалығымен санитарлық штабтың қорытынды отырысы өткізілді. Штаб отырысында қала аумағындағы тазалықтың сақталуын қадағалау мақсатында бөлінген сектор жетекшілері жауапты аймақтар бойынша жүргізілген жұмыстардың жай-күйін баяндады.Жалпы тазалық мәселесінде бізде толыққанды мәдениет қалыптаспағанын жасырмау керек. Бұған осы кезге дейін біздегі тазалық мәселесінің бір қалыпқа түспей келе жатқаны дәлел. Айталық әлі күнге дейін қала аумағында тазаланған жерлердің қайта бүліну дерегі жиі тіркеліп келеді. Демек бізде бұл мәселеге сергек қарау керек. Қойылған талап та тазалықты сақтау болып отыр. Соңғы бірер айдың көлемінде аудан бойынша 8 мәрте сенбілік ұйымдастырылған. Бұл туралы штаб отырысында белгілі болды. Осы тазалық шарасы барысында қала сыртындағы және көшелердегі қоқыс тасталған аймақтардың тазалануына мекеме қызметкерлері атсалысып, көлемі үлкен аймақтарды тазалау үшін техникалар жұмылдырылған. Сонымен қатар, топ жетекшілері әр секторда тұрғындарға рұқсат етілмеген жерлерге қоқыс тастамау қажеттігі жөнінде жүргізілген түсіндірме жұмыстарын, көше комитеттері мен тұрғындардың қатысуымен өткізілген жиындар және талап бұзған тұрғындарға заң аясында көрілген шараларды баяндап өтті. Қазіргі таңда тұрғындарға қала бойынша тазалыққа жауапты мекеме «Қуанышбек» ЖШС-мен келісімшартқа отыру жұмыстары жүргізілуде. Мұндағы негізгі мақсат та тұрғын үйлер мен мекемелерде жиналған қоқыс қалдықтарын арнайы орындарға шығару жайы. Осы мәселеде тұрғындар мүмкіндіктерді пайдаланып, тазалыққа сергек қарау керек.Жиын барысында әрбір сектордағы тазаланған орындарға қайта қоқыс тасталған жағдайлар слайд арқылы көрсетілді. Аудан басшысы бүгінгі күнге дейін атқарылған жұмыстарды тыңдап шыққан сектор жетекшілеріне тазаланған жерлерді осы күйінде ұстап тұру үшін рейд шараларын үздіксіз жүргізу қажеттігін айтты. Халық арасында тазалық мәдениетін қалыптастыру үшін күнделікті белгіленген аймақты аралап, тұрғындарға үнемі ескерту жасап отыруды тапсырды. Мұнымен қоса қоқыс жәшігі жоқ тұрғын үйлерден шығатын тұрмыстық қалдықтарды жинақтап, бір жерден қаптармен алып кету жұмыстарын үйлестіруді жауапты мамандарға жүктеді. Сондай-ақ, аудан әкімі сенбілік уақыты аяқталғанымен көшелердің түнгі жарықшамдарының толық жануын, әр аймақтағы ойын алаңдары мен аллеяларды қадағалау, кәсіпкерлік, әлеуметтік нысандар мен тұрғын үйлерді «Қуанышбек» ЖШС-мен толықтай келісімшартқа отырғызу үшін түсіндірме жұмыстарын жүргізу, негізгі міндеттер болып қала беретінін айтты.
Штаб отырысында аудан басшысы қала әкіміне жөндеуді қажет ететін барлық бейне камералардың толық іске қосуды, аудандық полиция бөліміне қаланың әсемдігі үшін безендірілген заттардың бүлінбей сақталуын бақылау, тәртіпті қадағалау және жауапты сала басшыларына бағдаршамдардың тұрақты жұмыс жасауын бақылау тапсырылды. Және де халықты тазалық сақтауға шақыратын мақалалар мен посттар және белгіленбеген орындарға қоқыс қалдықтарын тастау дерегімен заң талаптарын бұзған тұлғаларды әлеуметтік желілер мен бұқаралық ақпарат құралдарында ашық жариялау, күзгі мезгілде өткізілген тал егу акцияларының нәтижесі туралы хабарлау жүктелді.
«Толқын» ақпарат
