Кәсіби білім болашаққа бағытты айқындайды

"Жаңа ахуал білім беру және ғылым жүйесін түбегейлі реформалауды талап етіп отыр. Енді бұл саланың маңызы арта түсетіні анық. Тіпті экономиканың өзі соған тәуелді болмақ. Біз білім мен ғылым саласының болашақтағы рөлін айқын түсінуіміз керек. Мемлекеттік саясатты соған сәйкес жүзеге асырамыз. Білім беру және ғылымды дамытудың 2025 жылға дейінгі бағдарламасы бойынша жүзеге асырылатын реформаларды қайта зерделеу қажет. 2025 жылға дейін білім саласына бөлінетін қаражат 6 есе, ғылымға бөлінетін қаржы 7 есе өсетінін ескерген жөн" – деген Қазақстан Республикасының Презинді Қасым-Жомарт Тоқаевтың сөзінен-ақ бүгінгі таңда білімге, ғылымға деген басымдықтың қаншалықты маңызды екенін айқын көруге болады.

Расында отыз жыл бұрын ғана тәуелсіздікке қол жеткізген мемлекетіміз үшін бағындырған биіктер аз емес. Әлем елдерімен терезесі тең деңгейдеміз деп айта аламыз. Бірақ бүгінгі жаңалық күні ертең тарихқа айналып, көз ілеспей жылдамдықпен дамып жатқан қазіргі қоғам үшін белгілі бір деңгейде жетіп, сол биікте тоқтап қалуға болмайды. Сондықтан уақыт ағымымен бірге ілесіп, алдыға жылжып отыруға міндеттіміз.

Ол үшін әлбетте бірінші кезекте білім сапасының бәсекеге қабілетті, сын көтере алатындай дәрежеде болуы қажет-ақ. Әсіресе, егемен елдің ертеңгі тұтқасын ұстар білікті маман тәрбиелеу – біздің алдымызға қойылған бірінші мақсат. Бұл жайында да Мемлекет басшысы: "Кәсіптік-техникалық бағдарламасы арқылы жыл сайын 100 мың студент тегін оқиды. Аз қамтылған, көп балалы отбасы, ауылдан шыққан балаларға мән берілу керек... Жаңа техникалық мамандықтарды таңдаған кезде еңбек нарығындағы алдағы 10-15 жылдағы қажеттілікті ескеру керек. Бұл үшін Үкімет жаңа мамандықтардың атласын дайындау қажет" деген болатын. Расында мамандық таңдау да үлкен жауапкершілік пен болашақты сезінуге негізделу қажет деп ойлаймын.

Бүгінгі таңда Арал индустриалды-техникалық колледжі студенттерге таңдаған кәсібі бойынша білім беру ісінде жүйелі түрде жұмыс жасап келеді. Қазіргі таңда түрлі мамандықтар бойынша кәсіби білім алушыларға жасалған жағдай да жоғары. Және теориялық қана білім беруіп қоймай, практиканың өмірдегі алар орны ерекше екені де назарда ұсталып отыр. Колледж бүгінде толықтай талапқа сай жабдықталып, білім алушылардың жан-жақты дамуына мүмкіндік тудырып отыр. Мұғалімдер де ел президенті атап көрсеткен талапқа сай жұмыс жасап, ел ертеңін дамуда айрықша танылып келеді.

Аққалқа ҚОСЫМБАЕВА,

Арал индустриалды-техникалық колледжінің өндірістік оқыту шебері