Ерікті жасақ құрамы қолдау көрсетуде
Елімізде орын алған соңғы жағдайларға сәйкес төтенше жағдай жарияланып, қазір оның талаптары қатаң сақталып келе жатқаны белгілі. Жағдай тұрақталғанша жер-жерде арнайы блок-бекеттер қойылып, онда кезекшілікпен қызмет атқаратын қызметкерлердің жұмыс кестесі қауырт болуда. Қазірдің өзінде аудан аумағында 5 блок бекет қойылған болса соның ең маңыздысы қалаға кіре беріс қақпадағы «Арал арк» блок бекеті. Күре жолдың бойынан түсіп, қаланы бетке алған әрбір жолаушы сол блок-бекет арқылы қалаға кірері белгілі. Сол қақпада көліктерді жіті тексеріп, жағдайды бақылауда ұстап келе жатқан ондағы қызметкерлерге көмек қолын созған жандар да бар арамызда. Күннің суығында тікесінен тік тұрып, халықтың қауіпсіздігі үшін қырағылық танытып жүрген полиция қызметкерлеріне қолдан келген көмегін жасаған аудандағы тәжік-ауған соғысының ардагерлері де сын сағатта сыр алдырмаған қыз-жігіттердің қызметін жоғары бағалайды. Тіпті сол маңнан табылып, өздерінің көмектерін көрсеткен ардагерлер қоғам тыныштығын бақылауға атсалысты. Себебі олар да кезінде қолына қару ұстап бітімгерлік соғыс жолында шегара асқан сарбаздар. Тыныштық пен тас-түйін бірліктің неге жеткізерін олар жақсы біледі.– Біз соғыс көрген адамбыз. Тәжік-ауған шегарасында әскери борышымызды өтеу барасында әскери қақтығыстар мен қоян-қолтық ұрыстарға куә болғанбыз. Елімізде орын алған кешегі жағдайға байланысты біз де елдің, жердің жанашыр азаматы екенімізді көрсетіп, тәртіп сақшыларымен бірге ерікті жасақ ретінде блок-бекетте тұрмыз. Себебі бірлескен істе береке барын жақсы білеміз. Қоғамдық тәртіпті сақтауда құқық қорғау қызметкерлерінің жұмысы қауырт болатыны түсінікті. Қызмет солай болғанмен ел тыныштығы жолындағы жұмыста ол да сіз бен біз секілді мүдделі жандар. Сондықтан жерлестерімді сақшылардың жұмысына түсіністікпен қарап, төтенше жағдай талаптарын қатақ сақтануға шақырамын. Әсіресе коменданттық сағатта ретсіз жүруге болмайтындығын ескертемін. Қай кезде болмасын тәртіп сақтаған жөн, - дейді тәжік-ауған соғысының ардагері З.Әжіғұлов.
Иә, жанашыр азаматтардың бұл ісіне жұрт сүйсінер. Екі күндей Сексеуілдегі шойын жол үстінде тұрып қалған пойыз жолаушыларына жылы-жұмсағын ұсынып, ас-ауқатпен қамтамасыз етуде қайырымдылықтың озық үлгісін көрсете білген жерлестер әрекетіне жұрт сүйсінгені
Біз куә болған блок-бекеттегі жағдай да тура сондай қайырлы істің бір парасы. Жалпы Арал жұртшылығының қай уақытта болмасын қысылғанға демеу бола білетін қонақжай халық. Бұл жолы да аудан азаматтары елді бірлікке шақырып, қоғамдық тыныштықты сақтауға атсалысты.
А. ҚАРАСАЙ
