Орманды өрттен қорғайық

Ауданымыздың шабындық жерлерін өртеу кезінде бақылау жасамау салдарынан өзен-көл жағалауындағы тоғайлық алқаптар өртену фактілері азаймай келеді. Сол сияқты жазғы маусымда өзен-көл жағалауларында демалыс жасау кезінде жаққан оттарын сөндірмей кету салдарынан бұталы өсімдіктердің өртену фактілері кездесуде. Орманда қалдырылған тұрмыстық қалдықтардан, әсіресе, шыны сынықтарынан ормандар, бұталы өсімдіктер отқа орануы мүмкін. Өрт салдарынан бір ғана ағаштар залал шегіп қоймай, оларды паналаған аңдар мен құстар да аса көп зардап шегеді. Жоғарыда аталған жағдайларды баяндай келе, мемлекеттік орман қоры аумағында болған азаматтарға төмендегі жайларды ескерте кеткенді жөн санаймын:

– Орман-тоғайларда болған кезде өрт қауіпсіздігі ережелерін  қатаң сақтауды;

 – Шабындықтар мен жайылымдарда, егістік жерлерде өрт қауіпсіздігі ережелерін сақтамай тұрып, кез келген жерден от қойып, тазартуға тыйым салынады. Өзен-көл жағасында демалыс кезінде жаққан отқа абай болып, оттың толық сөндірілгендігін қадағалауды, тұрмыстық қалдықтарды арнайы жерді қазып, көму керектігін;

 – Автокөлік, темір жол бойларындағы қорғаныштық ормандар мен жекелеген ағаш-бұталарды, жас ағаштар мен өскіндерді сындыруға, бүлдіруге жол бермеуді;

 – Ағаштар мен бұталарды заңсыз кескен, зақымдаған, сындырған азаматтарға ҚР Әкімшілік құқық бұзушылық туралы кодексінің 367-бабына сәйкес (1 АЕК-3063 теңге).

Ормандарда өрт қауіпсіздігі талаптары  мен санитариялық қағидаларды бұзу

1. Ормандарда өрт қауіпсіздігі талаптары мен санитариялық қағидаларды бұзу жеке тұлғаларға – он, лауазымды адамдарға, шағын кәсіпкерлік субъектілеріне – отыз, орта кәсіпкерлік субъектілеріне – елу, ірі кәсіпкерлік субъектілеріне бір жүз елу айлық есептік көрсеткіш  мөлшерінде айыппұл салуға әкеп соғады;

2. Өрттің шығуына, адамның денсаулығына және қоршаған ортаға зиян келтіруге әкеп соққан дәл сол іс-әрекет, егер бұл  әрекет ірі залал келтірмесе;

– жеке тұлғаларға – жиырма бес, лауазымды адамдарға, шағын кәсіпкерлік субъектілеріне – қырық бес, орта кәсіпкерлік субъектілеріне –жетпіс, ірі кәсіпкерлік субъектілеріне – екі жүз елу айлық есептік көрсеткіш мөлшерінде айыппұл салуға әкеп соғады;

3.Осы баптың бірінші және екінші бөліктерінде көзделген, ерекше қорғалатын табиғи аумақтарда жасалған әрекеттер:

– жеке тұлғаларға – бір жүз, лауазымды адамдарға, шағын кәсіпкерлік субъектілеріне-екі жүз елу, орта кәсіпкерлік субъектілеріне-төрт жүз, ірі кәсіпкерлік субъектілеріне бір мың бес жүз айлық есептік көрсеткіш мөлшерінде айыппұл салуға әкеп соғады.

Орман және жануарлар дүниесі – біздің баға жетпес байлығымыз. Оны аялау, қорғау, сақтау, келер ұрпаққа бүлдірмей жеткізу – баршамыздың борышымыз.

Ә. АХМЕТОВ,

«Арал орман және жануарлар дүниесін қорғау жөніндегі мемлекеттік мекемесі»

коммуналдық мемлекеттік мекемесінің аға өрт сөндірушісі