Көптен күткен жаңалық
Ата Заңымызға енгізілетін кез келген өзгерісті жалпыхалықтық референдум арқылы халықпен кеңесіп, қабылдау дұрыс мәселе. Сондықтан мен Президентіміздің бұл бастамасын толық қолдаймын. Сонымен қатар бұл ұсыныс – ел Президенті жариялаған «Халық үніне құлақ асатын мемлекет» тұжырымдамасын іске асырудың лайықты жалғасы. Ел алдында тұрған үлкен міндеттерді айқындаған бұл үндеу – жаңа дәуірдегі мемлекет тұрақтылығы мен тәуелсіздігінің кепілі. Сонымен бұл үндеуде келер айдың 5-не республикалық референдум өткізу туралы Жарлыққа қол қойылғаны айтылды. Еліміздің Ата Заңында орын алатын ауқымды өзгерістердің барлық тетіктері халық ойынан шығады деген сенім мол. Өйткені референдумда тұтас қоғамның тілегі ескерілетін болады. Оны Мемлекет басшысы өз сөзінде айтты.– 27 жыл бұрын өткізілген референдумда қазіргі Ата Заң қабылданды. Одан кейінгі барлық конституциялық реформа Парламентте мақұлданды. Негізінде, бұл заңды қалыптасқан тәжірибе. Бірақ дамудың жаңа кезеңінде, Жаңа Қазақстанды құру жолында еліміз үшін осындай аса маңызды шешімдерді бүкіл халық болып қабылдауымыз керек. Бұған кәміл сенемін. Сондықтан бүгін мен Конституцияға өзгерістер мен толықтырулар енгізу үшін 5 маусымда республикалық референдум өткізу туралы Жарлыққа қол қойдым, – деді Қ.К.Тоқаев Қазақстан халқына жасаған бейнеүндеуінде.
Саяси сындарлы диалог пен экономикалық маңызды реформалар қоғамдық гүлдену мен мемлекеттің ертеңіне үлкен үміт ұялатады. Сондықтан да бұл саяси қадамның Жаңа Қазақстан құруды көздеген еліміз үшін маңызы зор деп білемін.
Әділхан ТАНЫМБЕТОВ,
Арал қалалық ардагерлер кеңесінің төрағасы
