Көпір салынса көп тілегі ақталар
Қаланың қақ ортасынан кесіп өтетін темір жол желісі көп жылдардан бері көлік қатынасында қиындықтар туғызып келе жатқанын жасырмаймыз. Транзиттік байланыста көптеген маңызға ие темір жол өткелі жабылған сәттерде жолдың екі жағында ұзындығы 1,5-2 шақырымға созылатын кептеліс пайда болатынын да көріп жүрміз. Жай жүргінші қанша уақыт болса да күтер. Алайда шұғыл қоңыраумен діттеген жеріне асыққан жедел жәрдем немесе өрт сөндіру қызметіне бұл кептеліс айтарлықтай кедергі келтіріп жатады. Санаулы минуты кептелісте тұрып жоғалған сәттерде көмекке мұқтаж жанның да жағдайы не болары бір Аллаға аян. Осылай өтіп жатқан өзгеріссіз қатынасты жеңілдете түсетін жаңалық естіп қуанып отырмыз.Аудан орталығы Арал қаласының темір жол бойына аспалы көпір салынады деген жағымды жаңалық бүгінде аудан тұрғындарының көңілін бір серпілтіп тастады. Енді соның шын мәнінде жүзеге асуын күтеміз. Жоба бойынша көпірдің ұзындығы 1 шақырымға жуықтайды екен. Онымен қоса екі жағынан жаяу жүргіншілер жолы салынып, түнгі жарық шамдары да орнатылмақ екен. Демек бұл үлкен құрылыс болғалы тұр. Егер осы жылдың соңына дейін нақты басталып кетер болса, халықтың билік басындағы азаматтарға алғыстан басқа айтары болмас еді. Өз басым осы игі жаңалықтың нәтижесін көрер күн алыс еместігіне сенемін. Барлығы оңынан болғай.
Е. СЕЙДАЛИЕВ
