Мұғалімдер «Ұстаздық қызметіне адалдығы үшін» құрмет белгісімен марапатталмақ

Бұл туралы ҚР Оқу-ағарту министрлігінің қаулысында көрсетілген. «Ұстаздық қызметіне адалдығы үшін» құрмет белгісі 25 жыл педагогикалық жұмыс өтілі бар ұстаздарға беріледі. Оның мақсаты – 25 жылдық ерен еңбегін елеп, осы қызметте сіңірген үлесін ескеру және оған ризашылық білдіру. Құрмет белгісі мектепке дейінгі және орта білім беру ұйымдарының, техникалық және кәсіптік, орта білімнен кейінгі білім беру ұйымдарының, мамандандырылған арнайы білім беру орындарының, жетім балалар мен ата-ана қамқорлығынсыз қалған балаларға арналған мектептердің педагогтеріне беріледі», –делінген министрлік құжатында.

Педагог аттестаттауға қатысты мәселенің бірі, педагогикалық өтілі 30 жылды құраған ұстаздарға жеңілдіктер жасау жөнінде сауалдар болатын. Бұл да өз шешімін табады. Атап айтсақ, егер осы категориядағы ұстаздар жаңа тұрғыдағы біліктілік санаттың иелері болып, өзі иеленетін санат деңгейінде қалғысы келсе, яки қайта қорғайтын жағдайда, онда бірінші кезең (тестілеу) шарасына қатыспай-ақ, екінші кезең (құжат тапсыру) шарасы арқылы өзінің санатын қорғай алады. Ал өзінің санатын бір сатыға көтергісі келген жағдайда, онда аттестаттаудың екі кезеңі (тестілеу+құжат тапсыру) бойынша да жұмысқа қатысатын болады.

"Толқын" ақпарат