Аса ірі мөлшердегі есiрткi затын заңсыз иемденіп, сақтап, тасымалдағаны үшін сотты болды

Арал аудандық сотында Қазақстан Республикасының ҚК-нің 296-бабының 4-бөлігімен азамат Ә-ға қатысты қылмыстық іс қаралды.Іс құжаттарына сәйкес, 14 қыркүйек 2018 жылы сағат 10.30 шамасында полиция қызметкерлері қызметтік иттің көмегімен жедел іздестіру іс шараларын жүргізу барысында, №377 «Алматы-Маңғышлақ» бағытына қатынайтын жолаушылар поездының №13 вагонының жолаушысы Ә-ның жол сөмкелерінен аса ірі мөлшердегі есірткі заты салынған орамалар табылған, яғни ол салмағы 16008 грамм болатын аса ірі мөлшердегі кептірілген «марихуана» есірткі затын өткізу мақсатынсыз заңсыз иемденіп, сақтап, тасымалдаған.
Сотталушының қылмыстық әрекеті, сотта өзінің айыбын мойындап берген жауабымен қатар, іс құжаттарымен толық дәлелденген.
Сот үкімімен сотталушы Ә. Қазақстан Республикасының Қылмыстық кодексінің 296-бабының 4-бөлігімен кінәлі деп танылып, 3 жыл 6 ай мерзімге бас бостандығынан айыру жазасы тағайындалды.
Сотталушының қылмыстық жауаптылығын және жазасын жеңілдететін мән-жайларға сот оның бұрын сотты болмағанын, тұрғылықты жерінен жақсы мінезделетінін, жасаған әрекетіне шын жүректен өкінетінін жатқызған.
Үкім заңды күшіне енбеген.
Арал аудандық сотының
баспасөз қызметі