Адам өліміне әкеліп соқтырған жол-көлік оқиғасы

Арал аудандық сотында Қазақстан Республикасының Қылмыстық Кодексінің 345-бабының 3-бөлігінде көзделген қылмыстық әрекетті жасаған азамат Т-ның қылмыстық ісі қаралды.Сотталушы Т. 2018 жылдың 15 маусымында сағат 04:00 шамасында, өзінің басқаруындағы «УАЗ» маркалы автокөлігін алкоголь ішімдігін ішкен масаң күйінде басқарып келе жатырып, Қазақстан Республикасының жол жүрісі қағидасының 2.4.2 тармағының талаптарын бұзып, автокөліктің басқару жүйесіне ие бола алмай қалып, нәтижесінде автокөлік аударылып, жол көлік оқиғасы орын алып, автокөліктің артқы орындығында отырған жолаушы Ш-ның абайсызда өліміне әкеп соққан іс-әрекет орын алған.
Сотталушының қылмыстық әрекеті, сотта өзінің айыбын мойындап берген жауабымен қатар, іс құжаттарымен толық дәлелденген.
Сот сотталушы Т-ны Қазақстан Республикасының ҚК-нің 345-бабының 3-бөлігімен кінәлі деп тауып, көлік құралын басқару құқығынан 3 жыл мерзімге айыра отырып, 9 ай мерзімге бас бостандығынан айыру жазасын тағайындады, жазасын қылмыстық-атқару жүйесінің қауіпсіздігі барынша төмен мекемелерінде өтеуге деп белгіленген.
Сотталушының қылмыстық жауаптылығын және жазасын жеңілдететін мән-жайларға сот оның бұрын сотты болмағанын, тұрғылықты жерінен жақсы мінезделетінін, жасаған әрекетіне шын жүректен өкінетінін жатқызған.
Үкім заңды күшіне енбеген.
Арал аудандық сотының
баспасөз қызметі