Сот бұзақылық фактісі бойынша медиативтік келісімді бекітті

Арал аудандық сотында Қазақстан Республикасының ҚК-нің 293-бабының 1-бөлігімен айыпталған К-ның қылмыстық ісі медиация тәртібімен тоқтатылды.Іс құжаттарына сәйкес, сотталушы К. 8 қараша 2018 жылы түңгі сағат 04.00 шамасында алкогольдік масаң күйде, бұзақылық ниетпен азаматша Б-ның үйінің алдында тұрған «Daewoo Gentra optimum» автокөлігінің есігін және капотын аяғымен теуіп майыстырып, жолаушы отыратын жағындағы есіктің терезесін қолымен ұрып сындырып, соңғыға 350 000 теңге мүліктік шығын келтірген. Бұдан соң ол, бұзақылық ниетін одан әрі жалғастырып, Б-ның тұрғын үйінің пластик терезесінің құны 50 000 теңге тұратын әйнек көздерін қолымен ұрып сындырып, оқиға орнынан бой тасалаған.
Сотта тараптар кәсіби медиатормен бекітілген, дауды реттеу жөніндегі медиативтік келісімді сотқа ұсынған. Медиативтік келісімге сәйкес, сотталушы мен жәбірленуші медиация тәртібімен татуласқан, келген зиян қалпына келтірілген, жәбірленуші сотталушыға ешқандай талап қоймайды.
Осының негізінде, сотталушы К. Қылмыстық кодексінің 68-бабының 1-бөлігінің талабына сай, қылмыстық жауаптылықтан босатылып, ісі өндірістен тоқтатылды.
Осылайша медиацияның қылмыстық процесте қолданылуы, сотталушымен жәбірленушіге келтірілген залалдың тез өтелуіне, сондай-ақ, қылмыстық жауапкершілікке тартылатындардың қоғамнан оқшауланбай түзелуіне мүмкіндік бермек.
Арал аудандық сотының
баспасөз қызметі.